MacBook шаклида қурилаётган Apple Store биносининг видео ва фотолари

Apple ўз дўконининг янги биносини алоҳида ўзига хослик билан оммалаштиришга қарор қилган кўринади. Унинг ноанъанавий меъморий ечими нафақат сайёҳларни, балки маҳаллий аҳолини ҳам ҳайратга соладиган даражада, деб ёзади Rappler.com.

Айниқса, компания ўзининг асосий маҳсулотларидан бири – MacBook шаклини томида акс эттира олгани, янги қурилаётган бинонинг очилиш маросимидан буруноқ шов-шувларга сабаб бўлаётир.

АҚШнинг Чикаго шаҳрида барпо этилаётган Apple Store дўкони биноси ҳозирданоқ оммавий ахборот воситаларининг диққат марказида. Уни Apple буюртмасига кўра Foster + Partners дизайнерлик гуруҳи лойиҳалаштирган. Иншоот ташқи кўриниши номдор ишлаб чиқарувчининг машҳур маҳсулотларидан бирини эслатади. Айни кунларда қурувчилар жамоаси бўлажак дўкон томига Apple’нинг логотипини ўрнатишди, бу жараённи кўпчилик қизиқувчилар фото ва видео тасвирларга олиб, интернетда тарқатишмоқда. Нақ текингина реклама, нима дедингиз?

Кўриб турганингиздек, бино томи MacBook шаклида ва рангида эканлиги барчанинг эътиборини жалб этаётир. 401 N. Michigan Ave манзилида қурилаётган ушбу бино компаниянинг Чикагодаги марказий дўкони бўлиши режалаштирилган.

Айтиш керакки, 2009 йили айни шу шаҳарда очилган, бундан олдинги Apple Store дўконига шу пайтгача 23 миллиондан ошиқ мижоз ташриф буюрган.

MacBook томли ва ойнаванд деворли Apple Store 1850 квадрат метр майдонни эгаллайди. Айтиш керакки, Foster + Partners томонидан 2015 йилда эълон қилинган дастлабки эскизида MacBook шаклидаги том йўқ эди.

Чикаго учун марказий бўладиган янги Apple Store дўконининг очилиши жорий йилнинг октябрь ойига мўлжалланган.