Маиший техника узоқ вақт хизмат қилсин десангиз…
Техникангиз узоқ вақт давомида хизмат қилишини истасангиз, ундан фойдаланиш қоидаларига риоя қилиш кифоя. Биринчи навбатда, ускуналарга илова қилинган йўриқномаларни диққат билан тўлиғича ўқиб чиқинг. Уларда ҳар битта буюмни парвариш қилиш ва ундан фойдаланиш бўйича барча маълумотлар келтирилган. Статистикага кўра, йўриқномада ёзилгани каби ускунадан фойдаланиш қоидаларига риоя қилинганида, техниканинг бузилиб қолиши билан боғлиқ ҳолатларнинг 95 фоизи юз бермаган бўларди.
Қурилмаларни ўрнатиш ҳам кўпинча хатоликка йўл қўйиладиган ҳолатлардан биридир. Агар гап йирик ва мураккаб маиший техника ҳақида бораётган бўлса, уни профессионал усталарни чақириб, ўрнаттирган маъқул. Техника текис юзага ўрнатилганига аҳамият беринг: ҳатто жуда кичик оғиш бурчаги бўлса ҳам, ускуна бузилиши мумкин.
Кир ювиш машинасига жуда кўп юк ортиб юбормасангиз, у сизга узоқроқ вақт хизмат қилади. Кийимларни ювишдан олдин, уларнинг чўнтакларини текшириб, барча майда-чуйда нарсаларни олиб қўйинг. Шунингдек, кир ювишда махсус кукун ва кондиционердан бошқа ҳеч нарса ишлатманг.
Совитгични тўғри парвариш қилиш у ҳали уйингизга етиб келмаган вақтдан бошланади. Уни вертикал тарзда ташиш керак, максимал оғиш бурчаги — 40 даража. Акс ҳолда компрессордан ёғ оқиб кетиши ва ускуна иши учун жавоб берувчи бутун тизимни ишдан чиқариши мумкин. Совитгичга иссиқ маҳсулотларни қўйманг, албатта совишини кутинг.
Ҳеч қачон бўш микротўлқинли печни ёқиб ишлатманг — электромагнит тўлқинларини ишлаб чиқарувчи қурилма учун бу ҳалокатлидир. Унга ўта оғир нарсаларни қўйманг (рухсат берилган максимал оғирлик йўриқномада кўрсатилади). Жуда енгил маҳсулотларни эса, яхшиси, яна бирорта бошқа озуқа билан бирга иситинг, шунда тўлқинларнинг бир қисмини у ўзига олади.
Манба: Daryo.uz
