Машҳур ўйинбоп смартфон халқаро бозорга сотувга чиқмоқда

Hasanboy
3118
17.01.2023 16:44

Red Magic 8 Pro модели ўтган йилнинг охирида Хитой бозори учун тақдим этилган эди. Мана энди бир неча ҳафтадан сўнг саккизинчи серия халқаро бозорга ҳам сотувга чиқади.

Red Magic 8 Pro моделининг орқа панели матовий қоплама билан қопланган. Шунинг учун уни компания матовий версия деб атади. Худди Хитой версия каби глобал матовий версия ҳам 12/256ГБ хотирага эга.

Иккинчи модель эса “Void“ деб номланди. У Хитой учун ишлаб чиқилган Pro+ версия каби 16/512ГБ хотира билан жиҳозланган. Хитой ва глобал версияларда тафовутлар мавжуд. Мисол учун, глобал версия 65 ваттда қувват олувчи 6,000 мАс сиғимли аккумуляторга эга бўлса, Хитой версия (Red Magic 8 Pro) ҳам 6,000 мАс сиғимли аккумуляторга эга. Аммо Хитой версия 80 ваттда қувват олади.

Агар Хитой версиялар тўлиқ қувватланиш учун 35 дақиқа вақт сарфласа, глобал версия 43 дақиқа вақт сарфлайди. Хитой учун ишлаб чиқилган Pro+ модель 5,000 мАс сиғимли аккумулятор билан жиҳозланган. Уни 165 ватт тезликда қувватлаш мумкин. Бу имконият глобал версияларда бўлмайди.

Смартфон 2 февраль санасида сотувга чиқади. Red Magic'нинг расмий веб-сайти орқали қурилмага олдиндан буюртма бериш мумкин. Нархлар билан қуйидаги суратда танишишингиз мумкин.

Red Magic 8 Pro моделининг бошқа техник кўрсаткичлари ҳақида маълумот бердиган бўлсак, қурилма 120 гертс янгиланиш ҳамда 960 гертс сенсорли намуна олиш частотасини қўллаб-қувватлайдиган 6.8 дюймли AMOLED дисплейи билан жиҳозланган. 16МП селфи камера экран остига жойлаштирилган. Ён томонда 520 гертс частотада ишловчи триггерлар жойлашган.

Смартфон LPDDR5X ҳамда UFS 4.0 хотиралари билан интеграллашган Snapdragon 8 Gen 2 чипида ишлайди. ICE 11 тизими чипни совутишга ҳизмат қилади. Шунингдек, гаджетда дақиқасига 20,000 марта айланадиган паррак ҳам бор. У паст шовқинда смартфон ичида ҳаво оқимининг юришини тезлатади.

Red Magic 8 Pro стерео динамик, иккита X-axis двигатели, 3.5 мм аудио жек, 50МП асосий ҳамда 8МП ультракенг камераларга эга. Икки моделни қандай қилиб бир-биридан ажратиб олиш мумкин? Фарқ шундаки, Void моделнинг орқа панели шаффоф шиша билан қопланган. Қурилма галактика рангида бўлиб, совутиш тизимидаги RGB чироқлари билан ушбу ранг ўзгача уйғунликни ҳосил қилади. Матовий версияда ҳам RGB LED чироқлари мавжуд, бироқ унинг орқа панели шаффоф шиша бўлмагани учун ундаги совутиш парраги кўринмайди.