Майкл Жексоннинг бошқалар уддалай олмайдиган ҳаракатлари олимларни қизиқтирмоқда

Нейрохирурглар Майкл Жексоннинг 1987 йилда илк бор намойиш этилган «Smooth Criminal» қўшиғига олинган клипдаги энкайиши тортиш қонунига зид эканини ўрганишмоқда.  Тадқиқот муаллифларининг таъкидлашича, қўшимча мосламаларсиз ҳатто машқ қилган одам ҳам бундай ҳаракатни амалга ошира олмайди, аммо машҳур қўшиқчи буни қандай уддалади экан?

Тадқиқотга «Қандай қилиб Майкл Жексон умиртқа биомеханикаси қоидаларига тўғри келмайдиган рақс ҳаракатларини бажаради?» деб ном берилган ва у  Journal of Neurosurgery: Spine журналида эълон қилинган.

Майкл Джексон — инсоният тарихидаги энг муваффақиятли мусиқа ижрочиси ҳисобланади. Бироқ у нафақат дунё залларини  мухлисларга  тўлдирди, балки бутун мусиқа индустриясига сезиларли таъсир кўрсатди.   Чунки, у дунёда биринчи бўлиб мусиқий клипларни суратга олишни бошлаб берган. Клиплари мини-фильмлар сифатида ўзининг сюжетлари, визуаль эффектлари ҳамда хореографияларига эга эди. Унинг энг машҳур  «Smooth Criminal» қўшиғи клипида Жексон танаси билан тик турганча 45 даражагача эгилиш усулини қўллайди. Инсоннинг бундай ҳаракат қилишга қобилияти йўқ.

Уч нафар ҳиндистонлик нейрохирург  — Майкл Жексон санъатининг шайдолари ушбу рақс ҳаракатларини ўзларининг касби нуқтаи-назаридан ўрганишга ҳаракат қилиб кўришмоқда. Уларнинг таъкидлашича оддий одам кўпи билан 20 даража бурчакда эгила олади, машқ қилганлар учун эса бу кўрсаткич 25-30 даражага етиши мумкин. Сўнгра улар ушбу рақс элементи аслида қандай бажарилганини тушунтиришга ҳаракат қилади.  Жексон патентлаштирилган ўзига хос конструкцияли тавонга эга ботинкадан фойдаланган. Ботинка тавони саҳна юзасидаги бирор нарсагами ушланиб турса керак— одатда у мих бўлади. Шунга қарамай, ҳатто шундай айёрликни қўллаш йўли билан ҳам одам 45 даражагача эгила олмайди, чунки унга танани ушлаб туриш учун мускул кучи ва тавондан оёқ тепасигача пай мустаҳкамлиги камлик қилади.

Айрим муаллифларнинг ёзишича, Жексон туфайли унга тақлид қилувчи раққосларнинг аксариятида янгича жароҳатлар пайдо бўлган. Жумладан, врачлар пай ва елканинг чўзилиши билан боғлиқ ҳодисаларни тез-тез қайд этадиган бўлишмоқда. «Майкл Жексон раққосаларни ўзини ўзи енгиб ўтишга илҳомлантирмоқда, — дея изоҳ беради авторларнинг бири  Манжул Трипати. — Тамошабинларни завқлантираман деб, амалга ошириладиган бундай трюклар аслида янгича жароҳатларни келтириб чиқармоқда.

Хуллас, поп-мусиқа қироли ўз рақслари билан бошқаларни нафақат илҳомлантирмоқда, балки тиббий ҳамжамият учун янги вазифаларни ҳам кўндаланг қўймоқда».