Meizu Pro 7 тақдим қилинди: 2 та рангли экранга эга илк смартфон

Meizu Pro 7 тақдим қилинди: 2 та рангли экранга эга илк смартфон

MEIZU компанияси навбатдаги -- Meizu Pro 7 флагман смартфонини расман тақдим қилди. 

Кутилганидек, бренднинг янги пешқадам "ақлли телефони" орқа панелидаги кичик, иккинчи рангли экрани билан смартфон бозоридаги рақибларидан ажралиб туради. Йўқ, бу экран YotaPhone'даги каби оқ-қора эмас ва орқа панелни эгаллаб олмаган. Қўшимча экран 1,9 дюймли. 

Гарчи, байроқдор бўлса ҳам, Meizu Pro 7'га ўрта нархли MediaTek Helio P25 процессори ўрнатилгани таассуфли. Бироқ, смартфонда аудиофайлларни қайта ишлайдиган алоҳида аудио-чипнинг борлиги -- яхши технологик ечим.

Жиҳатлари

Meizu Pro 7 девайси диагонали 5.2" дюймли, сиғими Full HD бўлган Super AMOLED экран билан таъминланган. Унинг илғор варианти бўлган Meizu Pro 7 Plus эса 5.7" дюймли, QHD (2560x1440 пикселли) экранга эга бўлган. 

Экран дизайнига кўра қалин ромлар билан ўралган ва бугунги флагманларга қараганда қўпол дизайнда. Шунинг ҳисобига, Meizu Pro 7 олд панелидан Meizu ёки Xiaomi'нинг арзон гаджетларини эслатиб юборади.

Meizu Pro 7 орқа панелида қўш объективли бош камера модуллари ва қўшимча экран мавжуд.

Флагманда SONY'нинг 6 линзали, 12 Мп + 12 Мп сиғимли IMX386 бош камера датчиги (f/2.0), 6 линза ва 16 мегапикселли (f/2.0) олд камера датчигидан фойдаланилган.

Гаджетда олинган фотосуратларни қайта ишлаш учун суратларни қайта ишлаш бўйича жаҳоннинг нуфузли сунъий тизимларини ишлаб чиқувчи ArcSoft компаниясининг алгоритми жорий қилинган. Қуйидаги сурат Meizu Pro 7 гаджетида олинган.

Шу билан бирга, Meizu Pro 7'да Master HIFI брендининг овозни студия сифатида  қайта ишлайдиган "рақамли-аналог" тизими жорий қилинган.

Шунингдек, смартфон олд панелда mTouch сканери ўрнатилган сенсорли-механик тугмага эга бўлган.

Корпусда 3.5 мм.ли аудио-туйнук сақлаб қолинган, смартфон корпуси сув таъсиридан ҳимоя қилинмаган.

Meizu Pro 7'нинг аккумулятор сиғими 3000, Plus талқинида 3500 мА соат, аккумулятор тезкор қувват олиш имконига эга.

Девайс Android 7.0 операцион тизимининг фирма томонидан ўзлаштирилган Flyme OS 6 талқини бошқарувида ишлайди. Бу тизим бармоқ излари сканерига смартфон ва ундаги иловаларни блоклаб қўйиш имконини беради.

Қўшимча экран ёки "5-оёқ" ?

Орқа панелдаги қўш объективли бош камера ва иккинчи сенсор ва рангли 1.9 дюйм (240х536 пиксел)ли AMOLED экран диққатни тортади. 

Бу экранда қўнғироқлар ҳақидаги эслатма ва огоҳлантиришлар, SMS ва бошқа маълумотлар акс этади. Мазкур экран ёрдамида бош камерада сифатли селфилар олиш мумкин. Шу билан бирга, ишлаб чиқарувчи яқин кунлар бу экраннинг қўшимча функцияларини эълон қилишни режа қилган.

Ички платформа

Тўғрисини айтганда, Meizu Pro 7 флагманининг ички платформаси жуда ҳам таассуротли эмас. Ундаги 8 ядроли Mediatek Helio P25 чипсети Хитойнинг 200 доллар турадиган ҳамёнбоп смартфонларида ҳам ўрнатилган. 64 битли бу процессорнинг частота тезлиги 2.6 ГГц.гача етади.  

Meizu Pro 7 Plus эса 64 бит ва 10 ядроли, частота тезлиги 2.5 ГГц.гача бўлган Mediatek Helio X30 процессори, IMG PowerVR 7XTP-MT4 (800 МГц) видео-картаси билан таъминланган.  

Meizu Pro 7 смартфони 4/64, Meizu Pro 7 Plus 6/128 гигабайтли тезкор ҳамда доимий ички хотирага эга бўлган.

Meizu Flow аудио-қулоқчинлари

Янги смартфонлар билан бирга Meizu компанияси "Flow" номли қулоқчинларни ҳам тақдим қилди. Уларда Bass Venting System овоз технологияси жорий қилинган. Бу аксессуар 2 модификацияда 73 ва 88 доллардан сотувга чиқарилади.

Meizu Pro 7'нинг сотувга чиқиши ва нарх-навоси

Meizu Pro 7 ва Pro 7 Plus куз ойидан кумуш, қизил, қора ҳамда тилла рангли корпусли талқинларда сотилади. Meizu Pro 7 модели 426, Pro 7 Plus эса 530 АҚШ долларидан бошлаб сотувга чиқарилади.

Рақиблари

Смартфон нарх-навоси билан iPhone SE, Huawei P10 ёки Xiaomi Mi 6 билан рақобат қилади.