Месси катта пул сабаб Samsung’дан кечиб, Huawei билан шартнома имзолади
Испаниянинг “Барселона” футбол клуби ўйинчиси Лионель Месси Huawei’нинг расмий қиёфаси ва халқаро элчиси этиб тайинланди. Маросим 17 март куни Испаниянинг Fairmont Rey меҳмонхонасида бўлиб ўтди.
Сўнгги 3 йил мобайнида Месси Samsung’нинг реклама роликларида суратга тушиб келаётган эди. Аммо футболда бўлгани каби, мобиль бизнесда ҳам пул энг муҳим масала.
Машҳур футболчи хитойлик йирик технология ишлаб чиқарувчисидан рад этиб бўлмайдиган даражада молиявий таклиф олгани айтилмоқда.
Huawei ва Месси ўртасида имзоланган шартнома қиймати расман эълон қилинмаган. Аммо хорижлик манбаалар Месси бунинг учун йилига 8 миллион евро ҳақ олишини айтишмоқда. Samsung эса Мессининг қиёфаси учун йилига 3 миллион евро тўлаб келаётган эди.
“Орзуга эришиш учун курашиш керак. Доим нимадандир воз кечишга тўғри келади ва шунга қарамасдан юксаклик томон интилиш керак. Шундай дамлар бўладики, ҳеч нарсани ўзгартиришнинг имкони қолмайди. Демак, олдимизга янги мақсадлар қўйиб, унинг сари боришга тўғри келади,” деди маросимда 5 маротаба ФИФАнинг “Олтин тўп” соҳиби Лионель Месси.
Huawei вакили Кевин Хо Жаҳоннинг 170 мамлакатида ахборот технологиялари йўналишида бизесини йўлга қўйган Huawei ва супер футбол юлдузи Мессининг ҳамкорлиги мантиқан тўғрилигини айтди.
“Лионель Месси бизнинг бренд ишқибозларини юксак мақсадлар сари бошлаб боради,” дейди у.
Эслатиб ўтамиз, Huawei 2015 йилда 108 миллион дона смарфтон сотиб, халқаро смартфон бозорида Apple ва Samsung’дан сўнг жаҳондаги энг йирик 3 брендга айланди. Компания жорий йилда смартфон бозоридаги сотувини 300 фоизга оширишни режа қилган.
