Металл корпусли Huawei P9 флагманининг илк суратлари эълон қилинди
Кутилганидек, Huawei компанияси MWC 2016 кўргазмасида янги Р9 флагман смартфонини намойиш этмасдан, Windows10 асосидаги MateBook планшет-трансформери билангина чекланди. Сўнгги гап-сўзларга қараганда, гаджет намойиши 9 март куни Берлинда бўлиб ўтади. Шунга қарамасдан, интернетда смартфоннинг якуний дизайнини бекитиб турган махсус ғилофдаги жосуслик суратлари пайдо бўлди. Суратда флагманнинг бир қатор ўзига хосликларини намоён этиб турганига эътибор қаратилди.
Huawei P9 асосий камерасида ҳақиқатдан ҳам лазерли автофокус билан таъминланган қўш модул мавжуд. Бармоқ изи сканери эса тўлиқ металл қобиқли смартфоннинг орқа томонига ўрнатилган. Дизайндаги айрим жиҳатлар, жумладан, датчиклар ҳажми суратда Huawei P9max фаблети тасвирланганидан далолат бермоқда. Аввал ошкор бўлган маълумотларга кўра, флагман бир неча талқинда ишлаб чиқарилади. Жумладан, енгиллаштирилган P9lite ҳамда қимматбаҳо Р9 Plus сотуви бошланади. Шунингдек, эълон қилинган суратларда Huawei P9 учун жилдда биометрик сенсор бир оз юқорироқда жойлашган.
Huawei P9 5,2 дюймли FullHD дисплей, компаниянинг саккиз ядроли HiSilicon Kirin 955 чипсети, 4 Гб тезкор хотира билан таъминланади. Асосий камера 12 Мп, олд камера эса 8 Мп ни ташкил этади. 2900 мАс ҳажмли аккумуляторни тезкор қувватлаш учун USB Type-C портидан фойдаланилади. Ушбу талқиндаги смартфоннинг нархи Хитойнинг ўзида 440 долларни ташкил этади.
