Mi 8 Plus ҳам тақдим қилинди
Айни пайтда Хитойда давом этаётган махсус тадбирда Xiaomi компанияси учта янги смартфон — Mi 8, Mi 8 Explorer Edition (Plus талқин) флагманлари ҳамда ўрта имкониятли Mi 8 SE моделларини тақдим қилди.
Xiaomi Mi 8 Explorer Edition моделининг ўзига хослиги олд панелда, экран юқорисидаги махсус кемтик қисмдан ўрин олган Face ID тизими бўлди. Мазкур хавфсизлик тизими Xiaomi компаниясининг ўзига қарашли. Оддий талқиндаги Mi 8 моделида бундай жиҳат мавжуд эмас.
Ўқинг: Galaxy S9/S9+ : суперфлагманларнинг сири!
Яъни, Xiaomi Mi 8 Explorer Edition моделида фойдаланувчи юзини текширувдан ўтказиш учун махсус инфра-қизил нурли модулдан фойдаланилган. iPhone X каби бундай камера тизими ҳам инсон юзидаги нуқта ва белгиларни текширувдан ўтказади. Компания бу технологияни Apple'дан ўзлаштириш билан бирга, унга алоҳида ном ҳам ўйлаб ўтирмади ва Face ID деб номлаб қўя қолди.
Face ID билан бирга, Mi 8 Explorer Edition моделининг экранига виртуал тарзда ишлайдиган бармоқ изи сканери ҳам ўрнатилган. Компаниянинг маълум қилишича, бу сканерининг ишлаши Vivo компанияси тақдим этган шундай муқобил технологиядан анча аниқ ва тезкор.
Xiaomi Mi 8 Explorer Edition телефон аппарати Хитойда 577 АҚШ долларидан сотилади.
