Mi Band 5 олмай туринг – янада арзон Mi Band 5 Lite ва кучли Mi Band 5 Pro ҳам чиқади!

Xiaomi яқиндагина Mi Band 5 номли идеал смарт-браслети расман намойиш этди. Бошқа мамлакатларда эса уни Mi Smart Band 5 номи остида, келаси ойда тақдим қилишади.

ЎҚИНГ: Mi Band 5’нинг бошқалардан фарқли 7 жиҳати ва янги расмлари

Mi Wear иловасининг кодини «кавлаштириб» кўрган дастурчилар эса мазкур фитнес-билагузукнинг иккита янгича версияси ҳақида маълумот топишди. Бу – нисбатан соддалаштирилган Mi Band 5 Lite ҳамда такомиллаштирилган Mi Band 5 Pro моделларидир.

Дастур кодида бу икки версиянинг оригиналидан фарқлари ҳақида маълумот йўқ, фақат кузатувчиларнинг бу борадаги тахминлари бор. Жумладан, Mi Band 5 Lite модели бу йилги оригинал фитнес-трекерда жорий этилган пульсни аниқлаш датчикидан маҳрум бўлиб, арзонроққа баҳоланади. Mi Band 5 Pro эса янги имкониятлар билан бойитилади; афтидан, оригинал моделда бўлиши кутилган, аммо унга жорий этилмаган пульсоксиметр татбиқ этилса керак.

Таъкидлаш керакки, Xiaomi компанияси одатда фитнес-браслетларнинг бундай версияларини чиқармас эди. Фақат Mi Band 4’дан ҳам кейин – ўтган йилнинг ноябрида тақдим этилган ўта арзон Mi Smart Band 3i бундан мустасно.

ЎҚИНГ: Xiaomi ҳар соатда қанча Mi Band 4 сотилаётганини айтди. Натижа ҳайратланарли!