Mi Mix 2: ромсиз дисплейнинг 2-авлоди тақдим этилади
Xiaomi Mi MIX 2 флагмани 2017 йилнинг 2-чорагида тақдим этилиши кутилаётган жаҳоннинг энг илғор смартфонларидан бири. 2016 йилнинг энг оммалашган Mi MIX’нинг “меросхўри” бўлмиш бу флагманнинг дизайн ечими Франциянинг машҳур технологи Филипп Старк томонидан ишлаб чиқилган.
gizmochina нашри ишончли манбаага асосланиб хабар беришича, Xiaomi Mi Mix 2’да экран томонларининг нисбати ошиб, икки ёнга қайрилган AMOLED-дисплей экраннинг 93% майдонини эгаллаб олган. Xiaomi Mi Mix’да бу 91%ни ташкил қилган.
Шунингдек, ушбу шиша экранда сенсорли бармоқ излари сканери ҳам мавжуд бўлади. Xiaomi бундай ақлли экран технологиясини такомиллаштиришда Goodix компанияси билан ҳамкорлик қилмоқда. Яқинда ўтказилган Жаҳон Мобиль Конгрессида Goodix компанияси Touch ID датчиги уйғунлаштирилган бу турдаги илк экранни намойиш қилган эди.
Xiaomi Mi Mix’нинг такомиллашган модификациясида экран диагонали ҳамда унинг пикселлар сиғими ортади. Унга Qualcomm’нинг энг кучли, 8 ядроли Snapdragon 835 процессори ўрнатилади. Смартфоннинг камера технологияси сифатини японларнинг Sony концерни ўз зиммасига олган. Xiaomi Mi Mix 2’да ҳам “MWC 2017’нинг энг яхши смартфони” бўлган Sony Xperia XZ Premium’даги каби, Motion Eye камера технологиясининг татбиқ этилиши кутилмоқда.
