Microsoft бармоқ изи сканерли клавиатура намойиш қилди (+видео)

  •   DiMaX
  •  1151
  •  16.06.2017 11:42

Microsoft бармоқ изи сканерли клавиатура намойиш қилди (+видео)

Яқинда Microsoft корпорацияси «замонавий» Microsoft Modern Keyboard with Fingerprint ID клавиатурасини тақдим этди. Унинг асосий хусусияти – бармоқ изи сканерига эга эканлигидир.

Хусусиятлари

Янги қурилманинг дизайни ўтган йилнинг октябрида чиқарилган Surface Keyboard’ни эслатади. Клавиатура симли ва симсиз (Bluetooth орқали) режимда ишлай олади. Унинг корпуси юпқа бўлиб, юзалари силлиқ.

Клавиатура таркибида алюминийдан фойдаланилганлиги сабабли у юқори даражада мустаҳкамликка эга. Яна айни шу боис у етарлича оғир ҳам – шунчаки қўлингиз тегиб кетганида столда сурилиб кетавермайди.

Microsoft Modern Keyboard with Fingerprint ID клавиатурасининг батареяси қурилманинг икки ойгача қувватлашсиз ишлашини таъминлай олади. Симсиз режимда Bluetooth орқали уланиш диапазони эса 15 метрни ташкил этади.

Бироқ мазкур клавиатуранинг асосий ўзига хослиги – Windows Hello’даги аккаунти орқали ишлаши учун фойдаланувчининг бармоқ изини танишидир. Сканер чап томондаги Alt тугмачаси ёнида жойлашган.

Ушбу клавиатуранинг видеотавсифини қуйидаги лавҳада томоша қилинг:

Мослиги ва нархи

Microsoft Modern Keyboard with Fingerprint ID клавиатураси қуйидаги операцион тизимлардаги қурилмалар билан ўзаро мосликда ишлай олади:

  • Windows: 10/10 phone/8.1/8
  • Android 4.4.2-5.0
  • Mac OS 10.10.5/10.11.1, и 10.11.4
  • IOS8.1-9.2.1

Мазкур клавиатура уланадиган қурилма юқоридаги операцион тизимлардан бирида ишлашидан ташқари, албатта BlueTooth 4.0 ёки ундан юқори версиясини қўллаб-қувватлаши ҳам лозим.

Бармоқ изи сканерига эга клавиатуранинг нархи 129,99 АҚШ долларини ташкил этади.