Microsoft: дунё бўйлаб 400 млн қурилма Windows 10 дастурида ишламоқда
Windows 10 операцион тизими тақдимотида Microsoft 2018 йилга келиб мазкур ОТ асосида 1 миллиарддан ортиқ қурилма ишлашини маълум қилган эди. Бироқ сўнгги пайтларда эълон қилинган статистикалар Microsoft компаниясининг юқоридаги прогнози кутилганидан секин амалга ошаётганини кўрсатмоқда. Бунга сабаб қилиб Windows 10 дастурида ишлайдиган смартфонларнинг оммабоп эмаслиги айтилмоқда. Шундай бўлса-да, Windows 10 асосидаги қурилмалар сони кундан-кунга ортиб бормоқда. Охирги ҳисоботларга кўра, мазкур версиядаги қурилмалар миқдори 400 миллиондан ошган. Мисол учун июль ойида Windows 10 дастуридаги қурилмалар 350 млн атрофида бўлган.
Microsoft’нинг хабар қилишича, Windows 10 версияси Windows 7 дастурига қараганда 115%га тезроқ оммалашмоқда. Бироқ Редмонд компаниясининг мазкур тасдиқларига қарамай, статистик кўрсаткичлар фойдаланувчилар Windows 10 дастурига кутилганидан секин янгиланаётганларини исботламоқда. Мисол учун 2016 йил июлгача бир ойга ўртача 30 млн қурилма дастурга янгиланган бўлса, кейинги ойларда ушбу кўрсаткич 16,6 млн тушиб кетган. Агар жараён ана шу суръатда давом этса, 2018 йилга бориб 800 млн қурилма Windows 10 версиясида ишлаши мумкин.
