Microsoft фойдаланувчиларга бирга смартфон яратишни таклиф этмоқда

Американинг Microsoft компанияси Windows Insider дастури иштирокчиларига “Биргаликда яратамиз”(Create Together) номли янги лойиҳада қатнашишни таклиф этди. Унга кўра, иштирокчилар ишлаб чиқариладиган янги смартфон ҳақида ўз фикр-мулоҳазаларини, аниқ таклифларини билдириши мумкин, деб хабар беради Windows Central.

Windows Insider дастури Microsoft ва тестчи мутахассислар ўртасида мулоқот яратиш ва шу орқали нафақат операцион тизим, балки смартфон ишлаб чиқариш бўйича ҳам ҳамкорлик ўрнатишга йўналтирилган.

Microsoft таклифига кўра, иштирокчилар смартфон ранги, дизайни ва унда кўришни истаган барча жиҳатларни аниқ кўрсатишлари лозим. Дастурда иштирок этувчилар учун минтақавий чекловлар бор-йўқлиги маълум эмас. Бироқ таклиф хати Windows Insider`нинг барча қатнашчиларига юборилган, дейди Windows Central.

Microsoft`нинг вице-президенти Гэбриель Эул (Gabriel Aul) аввалроқ Twitter фойдаланувчилари билан мулоқотда Windows Insider дастурини гаджетларда кенгайтириш қизиқарли бўлишини ёзганди. “Биргаликда яратамиз”(Create Together) ташаббуси шу йўналишдаги илк лойиҳа бўлди.

Microsoft компанияси илгари бундай лойиҳаларни ёпиқ ва тор доирада амалга оширган бўлса, эндиликда фойдаланувчилар фикри ҳамда таклифига ҳам алоҳида эътибор қаратмоқда. Чунки реал таклиф ва мулоҳазалар қурилмаларнинг оммавийлиги ва ишончлилигини таъминлайди.