Microsoft iPad Pro’дан 1,7 марта тезкор Surface Pro’ни тақдим қилди
23 май куни жаҳон миқёсида илғор электроника маҳсулотларига оид янгиликларга бой бўлди. Улар қаторида Microsoft компанияси Шанҳайда тақдим қилган илғор Surface Pro планшет компютерини алоҳида қайд этиш мумкин. Кетма-кетлигига кўра, бу галги планшет «Surface Pro 5» номидан воз кечган. Тақдимот чоғида ишлаб чиқарувчи 12,3 дюймли Surface Pro’ни унинг рақиби бўлиши кутилаётган 12,9 дюймли iPad Pro билан таққослади.
Бу гал Skylake архитектурасига эга Intel Core чиплари ўрнига Surface Pro планшети Kaby Lake авлодига мансуб чиплар билан таъминланган. Шунингдек, Surface Pro’нинг Intel Core m3, i5 ёки энг кучли Core i7 чипсетларига эга талқинлари ҳам ишлаб чиқарилади. Microsoft’нинг маълум қилишича, энг илғор процессорга, яъни Core i7’га эга Surface Pro планшети аввалги Surface Pro 3’дан 2,5 баробар, Apple A9X процессорига эга iPad Pro’дан 1,7 баробар тезкор ишлайди.
Intel Core m3 ва i5 талқинидаги планшет платформасида совутишга вентилятор, Core i7 ўрнатилган талқинга эса 18 дБ.дан юқори шовқин чиқармайдиган кулер ўрнатилади.
Surface Pro “аждоди”ники каби, 12,3 дюймли дисплейга эга. Унинг пикселлар сиғими 2736 × 1824 белгига тенг, ҳар дюймдаги пикселлар миқдори — 267 та белгини ташкил қилади. Корпусда USB Type-A ва Mini DisplayPort портлари, 3,5-мм аудио-туйнук, қувватлаш учун Surface Connect порти мавжуд.
Surface Pro’нинг энг кичик талқинида 4 гигабайтли тезкор хотира ва 128 гигабайтли доимий ички хотира ўрнатилган. Core i5 процессор талқинида эса 4 ва 8 ГБ тезкор ва 128 ёки 256 ГБ доимий хотира ўрнатилган. Core i7 чипига эга талқин эса 8 ГБ тезкор 128 ГБ доимий, шунингдек 16 ГБ тезкор ва 512 ГБ доимий хотира, унинг энг юқори талқини 16 ГБ тезкор ва 1 ТБ доимий хотира билан таъминланган.
Surface Pro билан бирга, компания Surface Pen стилусини ҳам янгилади. Маълум қилинишча, энди у босиш зарбасининг даражаси ва сезувчанлиги янада ошган.
Нарх-наво
Surface Pro’нинг энг арзон версияси “ақлли ручка”, клавиатура ва чехол билан бирга $930, бу аксессуарларсиз $799 долларга баҳоланган.
