Microsoft клавиатурага смартфонга хос илғор технологияни ўрнатди
Surface ноутбукларини тақдим қилгач, Microsoft компанияси бу йўналишда жаҳоннинг энг зўри ва ўзининг “ашаддий” рақиби бўлган Apple’га муносиб дизайн, дастурий таъминот ва платформага эга лаптоп билан жавоб беришга қодирлигини исботлай олди.
Modern Keyboard номли замонавий клавиатура компаниянинг навбатдаги илғор гаджетидир. Силлиқ ва кўркам дизайнга эга клавиатура корпуси алюминийдан тайёрланган ва жуда пишиқ. Қурилмани компютерга симли ёки симсиз улаш мумкин.
Modern Keyboard қурилмасидаги Bluetooth 4.0 интерфейси уни Windows 10, Android ва macOS тизимидаги гаджетлар билан 15 метргача бўлган масофада боғлайди. Клавиатурани бир марта қувватлаб, 2 ойгача ишлатиш мумкин.
Энг аҳамиятли жиҳати — унда биометрик аутентификация тизими жорий қилинган. Modern Keyboard девайсидаги Windows key — анъанавий тугмада бармоқ изларини сканердан ўтказувчи сенсор ўрнатилган. Windows компютерларининг тизимига кириш учун фойдаланувчи аввал бармоғини текширувдан ўтказиши керак бўлади. Шунингдек, бу сканер ёрдамида баъзи интернет ресурсларига кирганда ҳам Windows Hello хавфсизлик тизимини жорий қилиш мумкин.
Modern Keyboard Windows 8, Windows 8.1, Windows 10 (смартфонларга мўлжалланган талқинда ҳам), Android ва macOS операцион тизимларига эга қурилмаларда ишлайди.
Modern Keyboard $129.99 доллардан сотувга чиқарилади.
