Microsoft’нинг янги иловаси смартфонингиз блокировка экранига қўшимча имкониятлар бахш этади
Эсингизда бўлса керак, Windows 10 Mobile платформасининг умри тугаганлигини тан олган Microsoft компанияси энди смартфонлар бозорига бошқа эшикдан кириб келмоқда. Яъни, у Android-қурилмалар учун иловалар яратишга киришиб кетган. Жумладан, корпорация Android тизими учун Microsoft Launcher лаунчерини, iOS ҳамда Android операцион тизимлари бошқаруви остидаги қурилмалар учун Microsoft Edge мобил браузерини тақдим этган.
ЎҚИНГ: Windows 10 Mobile «вафоти»ни Microsoft тан олди
Энди эса мазкур компания Android операцион тизими учун Favorites Lock Screen деб номланувчи янги дастурини ишлаб чиқди. Бу илова смартфоннинг зерикарли блокировка экранини янги функциялар билан бойитишга мўлжалланган, деб ёзади AndroidInsider нашри.
Favorites Lock Screen иловасини қурилмангизга ўрнатиб олсангиз, кейин унинг блокировка экранига ўзингизга керакли айрим маълумот ва созламаларни чиқариб қўя оласиз. Жумладан, бу дастур туфайли фойдаланувчи ўзи кўп ишлатиб турадиган функцияларга чиндан ҳам тезкорлик билан – экранни блокдан чиқаришга ҳам вақт сарфламасдан кира оладиган бўлади. Дейлик, смартфоннинг симсиз интерфейсларини блокировка экранининг ўзиданоқ фаоллаштириш, шунингдек, почта иловаси, веб-браузер ва бошқа тизим иловаларини блокировка экранининг ўзидан ишга тушириш каби имкониятлар тақдим этилади.
ЎҚИНГ: Microsoft Edge браузерини энди iOS ва Android-қурилмаларга бемалол ўрнатиш мумкин
Айни дамда Favorites Lock Screen иловаси Google Play каталогига жойланган ва уни мана бу ҳавола орқали юклаб олиш имкони бор. Аммо негадир ҳозирча уни ўрнатиб олиш имконини фақат айрим фойдаланувчиларгагина тақдим этишган. Шунга қарамай, уни синаб кўришга ва доимий фойдаланишга қизиқаётган бўлсангиз, илованинг APK-файлини ушбу ҳавола орқали кўчириб олишингиз ва кейин ўзингиз ўрнатишингиз мумкин.
