Microsoft Surface Pro 4, Surface Book ва бошқа янгиликлар
Microsoft компанияси яқинди Нью-Йоркда бўлиб ўтган тақдимотида янги Surface Pro 4 гибридини ва Surface Book ноутбукини намойиш қилди.
Қуйида ушбу янгиликларга қисқача тавсиф берамиз.
Surface Pro 4 12.3 дюймли дисплейга эга, экран сиғими 2736х1824 пиксел ва зичлиги 267 ppi. Ушбу гаджет Intel Core олтинчи авлод процессорлари билан савдога чиқади. Тезкор хотираси 16 Гбайт, доимий хотираси эса 1 Тбайт бўлиши, аввалги авлодига нисбатан тезлиги 30%га ортиши кутилмоқда. Тачпад шишадан ясалган, 40% катталаштирилган, клавиатураси ноутбукникидек ва Microsoftнинг илгариги клавиатураларидан кўра юпқароқ. Планшетимизда 8 мегапикселли камера бор. Қурилма юпқалашиб (8,4 мм) ва енгиллашиб бормоқда. Бундан ташқари бармоқ изини сканерлаш функцияси мавжуд.
4 USB 3.0, Ethernet ва иккита монитор улаш учун портлар мавжуд. Экран махсус қаламчасининг заряди бир йилга етади.
Surface Pro 4 шу йилнинг октябр ойларида, 899 доллар бошланғич нархда сотувга чиқарилиши кутилмоқда.
Компаниянинг Surface Book ноутбуки 13.5 дюймли дисплейга эга, зичлиги 267 ppi, экран сиғими 3000х2000 пиксел.
Компания вакиллари клавиатура шовқинсиз ишлашини таъкидлашмоқда, клавиатура ёруғлик билан таъминланган, 12 соатгача ишлайди. Intel процессорлари, NVIDIAдан дискрет графика, GDDR5 ускунанинг тез ва маҳсулдор ишлашига кафолатдир.
Surface Bookнинг экранини клавиатура блокидан ечиб планшет каби ишлатишингиз ҳам мумкин. Гаджет оғирлиги 720 грамм, 7.7 мм қилинликда, клавиатура билан биргаликда 1.5 кг тош босади.
Энг оддий конфигурацияли бу ноутбук 1499 доллар нархда октябр ойида савдога чиқарилади.
Microsoftнинг навбатдаги янгилиги иккинчи авлод фитнес трекеридир. Гаджетда организм ва атроф-муҳит ҳолатидан дарак берувчи 11 датчик мавжуд: акселерометр-гироскоп, юрак ритмини назорат қилувчи оптик сенсор, ҳаво намлиги, ёруғлик, ультрабинафша нурлар, терининг ҳарорати ва гальваник реакциясини аниқловчи сенсорлар, GPS, сиғим датчиги, микрофон ва барометр. Бу ускуна жисмоний фаолликни комплекс таҳлил қила олади, уйғотгич сифатида ишлатиш мумкин.
Экрани қавариқ бўлган бу гаджет ҳам октябр ойида 249 доллар нархда сотилиши мўлжалланмоқда.
