“Мигрант” мобиль иловаси 10 минг мартадан ортиқ юклаб олинди
“Мигрант” мобиль иловаси Россияда меҳнат қилаётган ёки ишлашни режалаштираётган меҳнат муҳожирларига рус, ўзбек ва тожик тилларида хизмат кўрсатади. Ҳозирги пайтда дастурдан фойдаланувчилар учун Россияга кириш тақиқи бор-йўқлигини аниқлаш ҳамда патент ва ишга рухсатноманинг ҳақиқий эканлигини текшириш имконияти бор. Шу кунгача дастурдан фойдаланаётганлар сони 10 мингдан ошиб кетди.
Дастур меҳнат муҳожирлари учун ягона ва содда интерфейс орқали ижро ҳокимиятига қарашли турли органлар кўрсатаётган хизматлардан фойдаланишга имкон беради.
“Ҳозирги кунда дастурнинг атиги икки функцияси мавжуд. Лекин бу дастлабки версия ва айни пайтда кейинги версия устида қизгин иш кетмоқда”,- дейди “ЛексМобайл” юридик фирмаси раҳбари Ботиржон Шерматов. Унинг айтишича, дастурга фойдаланувчилар эҳтиёж ва талабларидан келиб чиққан ҳолда кўпгина фойдали ва қизиқарли қўшимчалар киритиш режалаштирилган. Жумладан,
- федерал солиқ хизмати сайтига кирмасдан патент учун тўлов квитанциясини шакллаштириш;
- тўлов ўтказиш;
- шахсий ИННни аниқлаш ва бошқа ишларни амалга ошириш;
- дастурга “эслатиш” функцияси киритилгач, у муҳожирни қачон патент учун тўлов ўтказиши лозимлиги, регистрация муддати қачон тугаши ва мамлакатни тарк этиши зарурлиги ҳақида ўз вақтида огоҳлантириб боради.
