Миллий университет сайти жаҳонда 6,565 ўринни эгаллади
Испаниянинг Cybermetrics Lab тадқиқот маркази эълон қилган рейтингдан дунёдаги 24 мингдан зиёд олий таълим муассасалари, хусусан Ўзбекистоннинг 66 та университет ва институтлари, халқаро даражадаги таълим марказлари, олий мактабларнинг веб-сайтлари ҳам ўрин олган ва улар рейтингли тизимда баҳоланган.
Унга кўра, юртимиздаги олий таълим масканлари орасида Ўзбекистон Миллий университети веб-сайти энг яхши, деб топилган. Шунингдек, рейтингда иккинчи ўринни Самарқанд давлат университети, учинчи ўринни Самарқанд қишлоқ хўжалиги институтининг веб-сайти банд қилган. Тошкент ахборот технологиялари университетининг веб-сайти эса рейтингда 4 ўринда турибди.
Бу йўналишда энг сўнгги ўринни Тошкент давлат Миллий рақс ва хореография олий мактабининг веб-сайти банд қилган. Ушбу мактаб жаҳон рейтингида 23,136 ўринни эгаллаган.
Юртимизнинг энг яхши веб-сайти деб топилган Миллий университет веб-саҳифаси жаҳон миқёсида эса 6565 ўринга муносиб кўрилган.
2004 йилдан бошлаб январь ва июль ойларида чоп этиладиган рейтингни шакллантириш жараёнида веб-сайтлар асосан техник жиҳатдан ўрганилади. Яъни улардаги қидирув имкониятлари, интерфейс, дизайн ва бошқа жиҳатлар ўрганилади.
Жорий йилда жаҳоннинг олий таълим муассасалари веб-сайтлари рейтингида Ҳарвард университетининг веб-сайти биринчи ўринни эгаллаган. Кейинги ўринлар Стэнфорд университети, Массачусетс технология институтига насиб қилган.
