Миллионлаб Xiaomi смартфонлари эгаларининг яна омади келмади

2017 йил якунида Xiaomi ўзининг Mi A1 смартфони учун Android 8.0 Oreo операцион тизимининг якуний прошивкасини тақдим этган эди. Аммо бу моделдаги кўпчилик қурилмаларда ёмон ишлаётгани сабабли компания мазкур прошивкани тарқатишни тўхтатиб қўйган, кейинроқ камчиликларини бартараф этиб, қайта тақдим қилган эди.

ЎҚИНГ: Xiaomi хатосидан миллионлаб смартфон харидорлари жабр кўрмоқда

Бироқ куни кеча маълум бўлишича, Mi A1 модели учун тақдим этилган янги Android 8.0 Oreo прошивкаси ҳам барқарор эмас экан. Унда яна бир қанча муаммолар аниқланган бўлиб, шу сабабли корпорация бу тизимни тарқатишни тағин тўхтатиб қўйди. MIUI расмий форумида Xiaomi ходимининг таъкидлашича, операцион тизимдаги янги муаммоларни бартараф этиш учун бир неча кун вақт керак бўлади.

Айтиш керакки, ўтган гал бундай ишга уч кун сарфланган эди.

ЎҚИНГ: Қай бирини олсам экан: Xiaomi Mi A1 ёки Nokia 6 (2018)?

Шу тариқа, ўз смартфонини Android 8.0 Oreo тизим талқинигача янгилаган Xiaomi Mi A1 эгаларига ҳавас қилиб бўлмайди. Биринчи мартасида фойдаланувчилар девайснинг ишлаш тезлиги пасайгани ҳамда батарея қувватининг тез тугаб қолишидан шикоят қилишган бўлса, ҳозиргисида жиддий муаммолар мавжуд. Улар сабабли телефон вақти-вақти билан қотиб қолиши, баъзан эса ўчиб қолиши ҳам кузатилмоқда.

Нима ҳам дердик, MIUI ишлаб чиқувчилари миллионлаб Xiaomi харидорларининг ишончини оқлашидан умид қиламиз-да энди.

ЎҚИНГ: Xiaomi смартфонлари бунчалик оммабоплигининг 5 сабаби