Минсклик харидор iPad’ни 3 халта 50 тийинлик чақага харид қилди
Беларусия пойтахти бўлмиш Минск шаҳрида яшовчи харидор 19 апрел куни шаҳардаги i-Store дўконидан 4G алоқа тармоғида ишлайдиган iPad (2017)’нинг 128 ГБ доимий хотира талқинини харид қилган. Бунинг учун у ўзи билан 1439 белорус рублини, яъни 770 АҚШ долларига тенг маблағни нақ 3 халта танга чақаларда кўтариб келди. Бу чақаларнинг аксарияти 50 тийинлик, 1 ҳамда 2 рубллик номиналлар бўлган.
“Олма” гаджетининг ноёб усулда харид қилиниши хусусида 42.tut ресурси маълум қилмоқда.
Дўкон сотувчисининг маълум қилишича, воқеадан бир ой аввал минсклик ёш оила дўконга кириб, уйида тўпланиб қолган йирик миқдордаги танга-чақаларга гаджет харид қилиши мумкинми, йўқми аниқлаштириб кетган бўлган.
«Ваъдамга мувофиқ, мана тангаларни олиб келдим», деган бир муддат ўтиб дўконга қайтиб келган оила бошлиғи ва стол устига 3 халта тангани қўйган. Тангаларни ҳисоблаб чиқиши учун сотувчига 20 дақиқа вақт керак бўлган.
