MIUI 13.5 эмас, MIUI 14!
Google ўзининг Android 13 операцион тизими барқарор версиясини кейинги ойда чиқаришга тайёрланяпти, шу билан биргаликда, унга асосланган Samsung'нинг One UI, Xiaomi'нинг эса MIUI қобиқлари ҳам бирин-кетин чиқарилиши кутилмоқда. Жанубий Корея компанияси, Samsung, ўзининг Galaxy'лари учун One UI 5.0 янгиланишини аллақачон тест қилишни бошлаб юборган. Xiaomi'га келсак, у яқинда MIUI 13 давомчиси, MIUI 13.5 ни чиқариши миш-миш қилинаётган эди, лекин эндиги хабарларга кўра, компания Android 13 га асосланган тўлиқ версия, MIUI 14 устида ишламоқда.
MIUI 14 ҳақидаги илк маълумотлар Xiaomiui.net томонидан айрим тизим иловаларини декомпиляция қилинганидан кейин уларнинг код базалари ичидан топилган бўлиб, у "nuwa" ва "fuxi" код номли смартфонлар, катта эҳтимол билан Xiaomi 13 ва Xiaomi 13 Pro смартфонларида синовдан ўтказилмоқда. Хиаоми янги MIUI версиясини келаётган август ойининг 16 санасида (MIUI қобиғининг энг биринчи версияси чиқарилганига 12 йил бўладиган кунда) эълон қилиши мумкин, унинг чиқарилиши эса ноябр-декабр ойларига, хитойлик компания ўзининг янги авлод смартфонларини тақдим қиладиган вақтга тўғри келади.
