Монитор ишламаса нима қилиш керак?

Монитор ишламаса нима қилиш керак?

Монитор ишламаслиги сабабларини келтириб ўтдим, энди сабаблардан келиб чиққан ҳолда муаммони ечишга ҳаракат қиламиз, мақола мониторнинг барча турларига тегишли (монитор турлари ҳақида). Дастлаб, мониторни тўғри уланганлигига эътибор беринг(агар улашни билмасангиз, биладиганлардан сўранг, уялманг). Қуйидаги расмда мониторни компьютерга улаш схемаси келтирилган.

Уланиш бошқа порт (HDMI) орқали амалга оширилиши ҳам мумкин. Компьютерни ёқдингиз, тизимли блок(системный блок) ишга тушди, лекин монитор ёнмади, яъни монитор индикатори ёнмади. Бу вазиятда қуйидаги ишларни амалга ошириш лозим:

1. Дастлаб, мониторни ёқувчи тугмасини босиб кўринг. Кўп ҳолларда монитор тугма орқали ўчирилмайди, лекин кимдир шу орқали ўчириб қўйган ва сиз буни билмаган бўлишингиз мумкин.

2. Агар монитор ёнмаса, бу дегани мониторга электр токи етиб бормади. Мониторни электр манбаига улаганда, монитор индикатори қизил ёки сариқ рангда ёниши лозим, бу ҳол монитор компьютерга уланмаган ҳолда ҳам содир бўлиши лозим. Электр манбаини розеткада мавжудлигини текшириш керак. Бунинг учун шу розеткага бирор бошқа қурилмани улаб кўринг ёки махсус ток мавжудлигини текширувчи индикаторли қурилмадан фойдаланинг.

3. Электр токи мавжудлигини аниқлаштириб олдик. Монитор ёнмаслигига яна бир сабаб, бу уланувчи симдир. Электр таъминоти билан мониторни уловчи кабель яхши уланганига ишонч ҳосил қилинг, яхшиси бу кабелни монитордан узиб, қайтадан уланг.

4. Кабель яхши уланган бўлса, кабель ичида қандайдир узилиш бўлган бўлиши мумкин. Буни текшириш учун, шундай типдаги бошқа кабель топиб алмаштириб, улаб кўринг.

5. Юқоридагиларни бажаргандан сўнг ҳам монитор ёнмаса, мониторнинг ички схемаси бузилган, яъни монитор физик бузилган ҳисобланади, бу ҳолда мониторни устага кўрсатиш лозим.

Демак, давом этамиз, мониторнинг индикатори ёнди, лекин ҳеч нарса кўрсатмаяпти, бу муаммони ҳал қилиш учун қуйидагиларни амалга ошириш лозим:

1. HDMI, VGA, DVI портларга уланувчи кабеллар яхши уланмаган, узиб қайтадан яхшилаб улаш лозим. Иложи бўлса, қотирилувчи айлантиргичларни яхшилаб айлантиринг.

2. Монитор билан компьютерни боғловчи кабель носоз, яъни кабель ичидан узилган. Буни текшириш учун, бошқа кабель топиб алмаштириб кўринг.

3. Видеокарта носоз. Бу кўп учрайдиган ҳолатлардан бири. Компьютер ичини очиб, видеокартани кўринг, ундаги парраклар айланмоқдами йўқми. Видеокарта motherboard(материнская плата)га яхши уланганми, слотдан бироз бўлса ҳам чиқиб қолмаганми, шу жойларига аҳамият беринг. Демак, гап видеокартада бўлиши мумкин. Агар уста топа олсангиз видеокартани тузатинг акс ҳолда бошқасини олишдан бошқа иложи йўқ.

4. Яна бир сабаблардан бири, мониторнинг драйвери нотўғри ишламоқда, ёки нотўғри драйвер ўрнатилган. Бу ҳолда хавфсиз режимга кириб драйверни текшириш лозим.

5. Монитор операцион тизим орқали нотўғри созланган, ўлчамлари ёки частотаси монитор ёнишини қониқтирмайди, бу ҳолда бошқа монитор топиб(паст частоталарда ҳам ишлайдиган), операцион тизимга кириб, созлашларни тўғирланг.

6. «Материнская плата»даги жанубий кўприк (южный мост) ишдан чиқган бўлиши мумкин. Бу кўприк видеокартани ишлашини таъминлайди, агар бу кўприк ишламаса, видеокарта ишламайди, бу дегани монитор ёнмайди. Буни текшириш учун тизим блокини очиб, у ердан жанубий кўприкни топиш лозим ва қўл билан тегиб қизиш ёки қизимаслигини билиш керак. Одатда бу кўприк қизимаслиги лозим (текшириш албатта компьютерни ўчирган ҳолда амалга оширилиши шарт).

7. Процессорнинг носозлиги ҳам, мониторни ишламаслигига сабаб бўлиши мумкин, лекин бу ҳақида компьютер ёнганда овоз орқали хабар беради (кўп ҳолларда). Бу ҳолда компьютер ишлайвериши мумкин, лекин монитор ёнмайди.

Агар монитор ёниб, BIOS’дан у ёғига ўтмаса, демак операцион тизимда муаммолар бор, бу ҳолни бартараф қилиш учун, хавфсиз режим орқали кириб операцион тизимни созлаш керак.

Юқоридаги сабаблар, мониторнинг ишламаслигига олиб келиши мумкин, бу ҳолларда қандай ҳаракат қилишни билиб олдингиз.

Манба: ITportal.Uz