Монстер батарея ҳажмига эга ўлмас смартфон!
Хитойнинг Oukitel номли кучли смартфонлар ишлаб чиқарувчи компанияси ўзининг WP сериясидаги янги WP19 смартфонини тақдим қилди. 21,000 mAh сиғимли батареяси билан мобил телефонлар категориясида рекорд даражадаги батарея ҳажмига эга бўлган ушбу смартфонда тинимсиз 36 соат видео томоша қилиш, 123 соат мусиқа тинглаш, 122 соат қўнғироқда гаплашиш мумкин. Тўлиқ қуввати билан ўртача фойдаланишда 1 ҳафтага етиши мумкин бўлган смартфондан агар фойдаланилмасангиз у 2252 соат тура олади. Бунчалик катта сиғимдаги монстер батарея 27W тезликда 4 соат давомида Тype-C порти орқали қувватланади.
Oukitel WP19 смартфони IP68/IP69К билан сув, чанг, юқори ҳарорат ва оғир босимга чидамли бўлиб, у 6.8 дюймли, 90Hz янгиланиш тезлигига эга LCD дисплей билан таъминланган. Таъкидлаш жоизки, экран бироз қалинроқ қора рамка билан чегараланган. Унинг юмалоқ тирқиш ичига жойлаштирилган олд камераси 64 мегапикселни ташкил қилади.
Орқа томонида эса учлик сунъий интеллект камера сенсорларига эга. Асосий камера 64MP (f1.79) ва у Samsung томонидан ишлаб чиқарилган. Унинг ёнидаги 2MP(f2.4) сенсор макро суратлар олиш учун бўлса, Sony томонидан ишлаб чиқарилган пастдаги 20MP (f2.0) камера тунда суратлар олишга мўлжалланган.
Шунингдек, камера сенсорлари ёнида жойлашган IR (инфрақизил) чироғи қоронғуда атроф-муҳитни кўришда ёрдам беради.
Смартфон капот остида MediaTek Helio G95 чипсети билан 8GB оператив ва 256GB доимий хотира билан Android 11 операцион тизимида ишлайди. Агар қўшимча хотира керак бўлса, Micro SD карта учун жой ҳам мавжуд. SIM карта учун эса иккилик жой ажратилган. Шунингдек, қурилма 3.5 миллиметрлик наушник порти ҳам бор. Қўшимчасига қурилмада юзни, бармоқни аниқлаш ва NFC сенсорлари мавжуд. Агар смартфоннинг ёмон томони бўлса, бу унинг "бирозгина" қалинлиги бўлиши мумкин.
Ҳозирда Oukitel WP19 телефонини AliExpress онлайн дўконидан $599 нархда онлайн сотиб олиш мумкин.
