Motorola Galaxy Z Flip учун жиддий рақобатчи тайёрламоқда!

Motorola Galaxy Z Flip учун жиддий рақобатчи тайёрламоқда!

Samsung букламафонлари, айниқса, Galaxy Z Flip модели шубҳасиз букланадиган смартфонлар бозоридаги энг оммабоплардан бири десак муболаға бўлмайди. Эҳтимол, унинг бозори чаққонлиги учун ҳам бошқа хитойлик смартфон ишлаб чиқарувчилари ўзларининг ана шундай чиғаноқли букланадиган смартфонларини яратишмоқда. Шулардан бири Motorola компанияси бўлиб, у аллақачон бир неча авлод Razr букламафонларини чиқарган. Унинг янгиси эса, шубҳасиз, Galaxy Z Flip'ни қийин аҳволда қолдириши мумкин.

Таниқли маълумот тарқатувчиларидан бири, Эван Бласс ўзининг Twitter саҳифасида Motorola'нинг янги авлод Razr букламафонининг суратларини улашди. Ҳали тақдим қилинмаган қурилма ҳозиргиси билан деярли бир хил дизайн ва иккилик камера жойлашувига эга, лекин ўзгаришлар йўқ эмас ва буларнинг энг каттаси орқа томонга ўрнатилган дисплей бўлади.

Суратларда навбатдаги Razr букламафонининг орқа томонидаги дисплейини кўришингиз мумкин. Бунда иккинчи дисплей смартфон букланган ҳолатидаги камера томонининг бутун қисмини эгаллаган, ҳатто, камера атрофларини ҳам. Шунингдек, тасвирларнинг бирида смартфон орқа дисплейи операцион тизим билан қандай ишлашини кўришингиз мумкин: иккита навигация тугмалари экраннинг чап пастки бурчакроғида, камералар ёнида жойлашган бўлса, билдиришномалар экраннинг қисмини эгаллаган.

Маълум бўлишича, Motorola'нинг ушбу янги букламафони номи деярли ўзгармайди. У Motorola Razr (2023) деб номланади ва ҳозирда "жуно" код номига эга.

Эҳтимол, юқоридаги расмлар бўлажак Motorola'нинг ҳали якунламаган рендерлари ҳам бўлиши мумкин, аммо улар тўғри бўлиб чиқса, Razr (2023) нафақат ўзидан олдингилар, балки бундай шаклда букланадиган смартфонлар орасидаги энг катта орқа дисплейга эга модел бўлади. Бу борада ҳозир Oppo'нинг Find N Flip 2 букламафони 3.26 дюймли экран билан етакчилик қилади. Galaxy Z Flip 4 эса атиги 1.9 орқа экранга эга.

ЎҚИНГ: Xiaomi 13S сериясини кутиб овора бўлманг!

Сайтимизнинг энг чиройли расмларини Инстаграмдаги саҳифамизда томоша қилинг!