Motorola ўзининг Razr 40 ва Razr 40 Ultra букламафонларини тақдим қилди!

Motorola ўзининг Razr 40 ва Razr 40 Ultra букламафонларини тақдим қилди!

Бир неча ойлик миш-мишлар ва маълумотлар тарқалишидан сўнг, ваниҳоят, Motorola ўзининг янги авлод Razr букламафонларини расман тақдим қилди. Улар "Razr 40" ва "Razr 40 Ultra" деб номланади. Агар уларни "Razr (2023)" ва "Razr+" деб аталаётганини эшицангиз ҳам ҳайрон бўлманг – улар АҚШ бозори учун шундай номланган. 

Razr 40 (ёхуд Razr (2023))

Янги Razr сериясидаги ушбу букламафон бошланғич модел бўлиб, у ўзидан катта моделга қараганда анча кичик орқа экранга эга. Эҳтимол, буни Motorola ўзининг букланадиган смартфонларига ўрнатган энг кичик қўшимча дисплей дейиш мумкин. Gorilla Glass Victus ҳимоя панели остидаги 1.47 дюймли (пиксел резолюцияси 194×368) ушбу экран сизга билдиришномалар ва об-ҳаво маълумотларини кўриш ва мусиқани бошқариш кичик имкониятларга эга. У худди Galaxy Z Flip 4 да бўлгани каби орқа камераларга бирлаштириб юборилган.

Камераларга ҳақида гап кетганда шуни айтиш керакки, букламафон 64 мегапикселли асосий (OIS билан) ва 13 мегапикселли ултра-кенг (макро линза билан) камералар билан жиҳозланган. Букламафонни очадиган бўлсангиз, сиз 6.9 дюймли 144 герц янгиланиш тезлиги ва 2640×1080 пиксел резолюстиясидаги pOLED дисплейга эга бўласиз. У ерда селфилар учун 32 мегапикселли камера ҳам бор.

Техник хусусиятларга келадиган бўлсак, Razr 40 ёхуд Razr (2023) букламафони Snapdragon 7 Gen 1 чипсетида 8/12 GB оператив ва 128/256 GB доимий хотира билан Android 13 операцион тизимида ишлайди. Бунда у уч йиллик Android, ҳамда 4 йиллик хавфсизлик янгиланишларини қабул қилади. Букламафоннинг бир кун ёки ундан кўпроққа етиши айтилаётган 4200 мА/соат батареясини USB-C кабел билан 30 Вт тезликда, симсиз эса 5 Вт тезликда қувватлаш мумкин.

Қатордаги оддий модел бўлишига қарамай, Razr (2023)/Razr 40 орқа томони чарм билан қопланган ва у қаймоқ ранг, сиёҳранг ва яшил рангларда таклиф қилинади. Унинг нархи Европа мамлакатларида 799 евродан бошланиши айтилмоқда. 

Razr 40 Ultra (ёхуд Razr+)

Motorola'нинг бу йилги "ҳақиқий" Razr букламафони, Razr 40 сериясидаги юқори модел – Razr 40 Ultra (ёхуд Razr+) букламафонига келсак, у ўзининг орқа томонидаги жуда катта қўшимча экрани билан яққол кўзга ташланади. Таъкидлаш жоизки, ҳозирги кунга қадар букламафонларга ўрнатилган энг катта орқа экран ҳисобланади. Бунда қурилмани "қўшимча экранли смартфон" эмас "икки экранли смартфон" дейиш мумкин. Эҳтимол, сиз ушбу ташқи экрандан асосий экранга қараганда кўпроқ фойдаланишингиз мумкин, чунки у букламафонни очмасдан туриб ундаги деярли барча иловаларга кириш имконини беради. Ажойиб шундай эмасми?

Ушбу pOLED қўшимча дисплей 3.6 дюйм (1066×1056 пиксел) ўлчамда бўлиб, у 1100 нит максимал ёрқинликка эриша олади. Gorilla Glass Victus билан ҳимояланган экран янгиланиш тезлиги 144 герц. У орқали сиз YouTube видеолар кўришингиз, Google Maps харитасидан фойдаланишингиз, электрон почта хабарларига букламафонни очсмасдан жавоб йўллашигиз ва ҳатто ўйин ўйнашингиз ҳам мумкин.

Кўриб турганинггиздек, орқа экран смартфоннинг икки камералари ва LED чироғини ҳам ўз ичига олади. Ушбу камераларнинг асосийси 12 MP (f/1.5) бўлса, иккинчиси 13 MP (f/2.2). Катта қўшимча экран билан ушбу камералар орқали тасвирлар олиш янада қизиқарли бўлади. Масалан, асосий камера орқали сиз ўзингизни кўриб турган ҳолда селфилар олишингиз ёки кимдир сизни асосий камера билан видеога олаётганда ўзингизни орқа экран орқали кўриб туришингиз мумкин.

Ичкарига ўтадиган бўлсак, букламафоннинг асосий экрани 6.9 дюйм ва у 165 герц янгиланиш тезлигига эга. FHD+ резолюциясидаги ушбу экран 1400 нит максимал ёрқинллик эриша олади. Ушбу экраннинг юқори марказидаги юмалоқ тирқишда 32 мегапикселли селфи камера жойлашган.

Қурилма капот остида Snapdragon 8+ Gen 1 чипсети, 8/12 GB оператив ва 256/512 GB доимий хотира билан Android 13 операцион тизимида ишлайди. Гарчи юқори модел бўлса ҳам, букламафон оддийсига қараганда бироз кичикроқ батареяга эга: қурилманинг 3800 мА/соат батареясини 30 Вт тезликда сим орқали, 5 Вт тезликда эса симсиз қувватлаш мумкин.

Алоқа ва уланиш борасида 5G, Wi-Fi 6e ва Bluetooth 5.3 технологиялари қўллаб-қувватланади. Шунингдек, букламафонда, иккилик стерео овоз кучайтиргичлар, 3 та микрофон, контактсиз тўловлар учун NFC, ҳамда, хавфсизлик учун бармоқ изи сканери (ён томонда) мавжуд. Қурилма IP52 сертификати билан сувга чидамли деб топилган.

Razr 40 Ultra/Razr+ букламафони қора ва мовий (чармсиз, шиша ойнали) шу билан бирга магента (чармли) рангли вариантларда сотувга чиқарилади. Европа мамлакатларида унинг нархи 1199 еврога, Razr+ (256 GB) эса АҚШда 999 долларга баҳоланган.

Букламафонлар сотувлари Хитойда 5 июндан, Америкада 23 июндан, Европа мамлакатларида эса бугундан бошланади. 

Хабарларни тез ва осон ўқиш учун Андроид иловамизни сақлаб олинг.