Motorola RAZR изидан: яна иккита хитойлик смартфонсоз «раскладушка» тайёрламоқда

DiMaX
803
16.11.2019 13:19

Хитойлик бренд куни кеча ўзининг биринчи буклама смартфони – Motorola RAZR моделини тақдим қилди. Шу пайтгача тарқалган хабарларда уни Motorola RAZR 2019 ва Motorola RAZR V3 каби номлар билан ҳам атаб келишаётган эди.

ЎҚИНГ: Oppo дунёдаги илк - ҳам букилувчан, ҳам камераси корпусдан чиқувчи смартфонни патентлади! (+Render)

Шунингдек, Samsung ҳам аввалроқ вертикалига букланувчи букламафонни патентлаган эди. Энди эса яна иккита машҳур компания «раскладушка» форм-факторли қурилма тайёрлаётгани ҳақида маълумотлар пайдо бўлди.

Xiaomi ҳатто Motorola’дан ҳам аввал бошлаган экан!

«Хиточа Apple» бундай смартфонга патент олиш учун 2018 йилнинг августидаёқ патент аризаси берган экан, аммо патент идорасининг сайтида у ўтган ойдагина «кўринган». Чизмаларига кўра, Xiaomi тайёрлаётган қайишқоқ дисплейли «раскладушка» анчагина юпқа:

Умумий форм-фактори Motorola RAZR дизайнида бўлган бу смартфоннинг қўшимча экрани кичкина, аммо олд ва асосий камералари қўш датчикли.

Xiaomi’нинг ўзи бу тўғрида ҳозирча расман маълумот бермаган, унинг ҳозиргача чиққан айрим смартфонларини эса 810 000 сўмдан бошланувчи нархлар эвазига Terashop.uz’дан сотиб олиш мумкин.

ЎҚИНГ: Samsung Xiaomi'дан "ўғирласа" қандай бўлади?

Xiaomi-ку майли – у аввалдан етакчи компанияларга тақлид қилиб келади. Лекин дунёнинг иккинчи рақамли смартфонсози – Huawei ҳам Motorola’га эргашиб, RAZR услубидаги букламафон устида ишлаётганига нима дейсиз?

Етакчилар ҳам эргашади

Интернетда тарқалган маълумотларга кўра, хитойлик техногигант Бутунжаҳон интеллектуал мулк ташкилоти (World Intellectual Property Organization, WIPO)га патент аризаси берган. Унинг хусусиятлари номаълум, лекин расмларда катта қайишқоқ экранли, тиккасига букилувчи смартфон акс этган:

Суратларга қараганда, Huawei смартфоннинг ташқи дисплейи борасида антиқа ечим ўйлаб топган. Қурилма ёпилганида, корпусининг ташқи панели охиригача ёпилмай, ортида қўшимча экран кўринади:

Huawei ишлаб чиқаётган «раскладушка» ромсиз экрани ҳамда уч модулли биттагина камераси билан ҳам бошқаларидан ажралиб туради. Бу маҳсулот борасида ҳам расмий маълумот йўқ, аммо биринчи – Mate X букламафонининг илк партияси яхши сотилганидан келиб чиқиб, хитойлик гигант кейингиларига ҳам илҳом билан киришса ажабмас.