МТС «Ўзбекистондаги поралар» иши туфайли америкалик ҳуқуқшунослардан даъво аризаси олди
Американинг Rosen Law юридик фирмаси «Мобильние телесистеми» ширкатига қарши синфий даъво билан чиқди. Бу тўғрида «Интерфакс» хабарига асосланиб «Дарё» нашри ёзмоқда.
ЎҚИНГ: МТС Ўзбекистондаги шўъба корхонасини 1 долларга сотди
Rosen Law хабарида айтилишича, 2014 йил 19 мартдан 2019 йил 7 мартгача бўлган даврда Россия компанияси қимматли қоғозларини сотиб олган барча инвесторлар унга қўшилиши мумкин.
Даъволар МТС компаниясининг Ўзбекистондаги фаолиятига алоқадор коррупцияга қарши текширув билан боғлиқ. Унинг якунларига кўра, 7 март куни эълон қилинганидек, оператор АҚШ ҳукуматига жами 850 миллион доллар тўлаб беради.
Rosen Law’нинг билдиришича, МТС компания коррупцион схемаларга жалб этилгани ҳақидаги маълумотни инвесторлардан яширган, унинг доирасида 420 миллион доллар миқдорида пора берилган, шунингдек, бозорга суриштирувларнинг эҳтимолий оқибатлари кўламини сездирмаган.
ЎҚИНГ: Мобил операторлар биздан нимани яширмоқда?
АҚШ маҳкамалари 2014 йилдан бери операторнинг Ўзбекистондаги бизнеси бўйича МТСга нисбатан коррупцияга қарши суриштирув ўтказган. Америка ҳукуматининг билдиришича, МТС, VEON (аввалги Vimpelcom Ltd.) ва Telia Ўзбекистон телекоммуникация бозорига кириш мақсадида мамлакат собиқ президенти оиласи билан боғлиқ тузилмаларга кўп миллионлик поралар учун сохта компаниялар ҳамда консультатив шартномалар тармоғидан фойдаланган. VEON суриштирув якунлари бўйича 2016 йилда 795 миллион доллар, Telia Company эса 965 миллион доллар жарима тўлади.
2016 йилда МТС Ўзбекистондаги бизнесдан чиқиб, маҳаллий ҳукуматга Universal Mobile Systems (UMS) операторидаги 50,01 фоиз акцияларни рамзий 1 долларга сотди. Шу тариқа, 2014 йилда Ўзбекистон бозорига қайтганидан сўнг, МТС мамлакатдан якуний чиқиб кетишига қадар икки йил ҳам ишламади. Аввалроқ, МТС Ўзбекистондаги бизнесни йўқотган эди – 2012 йилда оператор шўъбаси «Уздунробита» – ўша вақтда абонент базаси 9,3 миллион киши бўлгани ҳолда ўзбек алоқа бозорида етакчи бўлиб турган компания лицензиядан маҳрум этилди. 2014 йил охирида МТС барча даъволарни ҳал қилиш бўйича расмийлар билан келишув битимини имзолади. Натижада, МТС компанияси UMS’нинг 50,01 фоизини, «Радиоалоқа, радиоэшиттириш ва телевидение маркази» ДУК (Ўзбекистон собиқ Давлат алоқа қўмитаси тузилмаси) 49,99 фоизини олди. Қўшма корхона «Уздунробита»нинг инфратузилмаси ва ускуналарида ишлаган.
Синфий даъво (class action) – акциядорларининг чекланмаган доираси томонидан компания эмитентининг ўзига, раҳбариятига ёки директорлар кенгаши аъзоларига қарши даъво қўйилиши. Ушбу амалиёт АҚШда энг кенг тарқалган бўлиб, кўплаб юридик фирмалар унга ихтисослашган.
Rosen Law – бозорнинг бу сегментидаги етакчилардан бири. Синфий даъвога компания капиталлашувига салбий таъсир кўрсатган ҳар қандай ҳодиса олиб келиши мумкин, дейилади хабарда.
ЎҚИНГ: Speedtest синовидан «жонли» видео: Ўзбекистонда қайси уяли алоқа операторининг интернети энг тезкор?
