Мутахассислар энг хавфли смартфон иловаларини эълон қилишди
Appthority компаниясининг киберхавфсизлик соҳаси мутахассислари корпоратив мижозларга таҳдид қилувчи энг хавфли мобил иловалар рўйхатини эълон қилишди. Унга кўра, iOS-қурилмалар учун энг таҳдиди юқори бўлган иловалар WhatsApp ҳамда Facebook Messenger мессенжерлари, шунингдек, Waze навигация дастури экан.
ЎҚИНГ: iPhone’даги ҳозироқ ўчириб қўйиш керак бўлган тўртта созлама
Шунингдек, Android тизимида ишловчи девайслар учун энг хавфли дастурлар антирейтингида ҳам WhatsApp ҳамда Facebook Messenger иловалари етакчи. Учинчи ўринда эса кенг оммалашган Telegram мессенжери туради.
Тадқиқотчиларнинг таъкидлашларича, Waze ҳам, Telegram ҳам хавфли иловалар рўйхатидаги «кучли учлик»ка илк бора киришган.
Facebook ва WhatsApp мессенжерлари хавфлилик бўйича 10 баллдан 7 балл олишган. Бу кўрсаткич шуни англатадики, бу иловалар корхоналар билан боғлиқ маълумотларни серверларга юборади, ёки бўлмаса, хавфсизлик сиёсати талабларига мос келмайди. Масалан, рейтингга киритилган сервиснинг кўпчилиги смартфондаги контактларни ва SMS-хабарларни серверга жўнатиб туради, шунингдек, махфийликни таъминловчи HTTPS протоколини ўчириб қўяди.
Шунингдек, маълумотлар «сизиб» чиқиб кетмаслиги учун қайси турдаги дастурлардан эҳтиёт бўлиш лозимлигини ҳам экспертлар айтиб ўтишган. Бундай тоифага асосан мессенжерлар, ижтимоий тармоқлар клиентлари ҳамда онлайн танишув сервислари киради.
