Мутахассислар: Жорий йилда «ўйиқ» дисплейли телефонлар оммалашади
Ўтган йили дисплейи «ўйилган» iPhone X катта шов-шувларга сабаб бўлган эди. Мутахассислар жорий йилда дисплей дизайни айни шундай «кемтик»ка эга смартфонлар бозорни тўлдириши ҳақида башарот қилмоқда. Бунинг баъзи техник сабаблари мавжуд.
Экрани бироз юқорига ўйилган ва олд камераси кичик «кемтик»ка жойлаштириб чиқарилган илк телефон Essential Phone эди. Apple эса ўз iPhone X'сида қулоқ динамиги, ёруғлик ва ҳаракат сенсорлари ҳамда олд камерани каттароқ «кемтик»ка жойлаштириб, бундай дизайнни оммалаштириб юборди.
2017 йил дисплейи 18:9 нисбатга эга узунасига катта смартфонларга бой бўлди. Шунингдек, ишлаб чиқарувчилар бутун олд қисми экран билан қопланган ромсиз қурилмалар яратишга зўр бердилар. Жорий йилда ҳам тўлиқ дисплейли ромсиз телефонлар сафи кенгайиши тахмин қилинмоқда ва бундай қурилмаларни яратишда айнан «ўйиқ» дизайн катта ёрдам беради.
2017 йилда бутун олд қисмини дисплей эгаллаган «байроқдор» смартфонларнинг бозордаги нисбати 80 фоиздан ошиб кетди, яъни халқаро телефон бозорини, асосан, шундай қурилмалар эгаллади. Бутун телефон юзини дисплей билан қоплашда эса айнан «ўйиқ» дизайн катта ёрдам беради. Экран ичида яриморол шаклида қолдирилган «кемтик» жойга энг замонавий қурилмаларда бўлиши зарур бўлган қулоқ динамиги, ёруғлик ва ҳаракат сенсорлари ҳамда олд камерани осонлик билан жойлаштириш мумкин. Қурилманинг бўш қолган юқори қисми эса ҳеч қандай қийинчиликсиз дисплей билан қопланади. Мутахассислар айнан шу йўл орқали бутун юзи дисплей билан қопланган «байроқдор» смартфонларнинг халқаро бозордаги нисбати жорий йилда 90 фоизга яқинлашишини тахмин қилмоқда.
Бироқ ҳамма фойдаланувчилар ва ишлаб чиқарувчилар ҳам «ўйиқ» дисплейли дизайнни бирдек маъқул кўрмаслиги турган гап.
Бутун қурилма юзини дисплей билан қоплаш учун, шунингдек, ҳудди Samsung Galaxy S9'даги каби смартфон юқорисидаги керакли жиҳозларни ингичка чизиққа жойлаштириш ҳам мумкин.
Бундан ташқари Xiaomi компанияси ўзининг янги Mi Mix 2 ва Mi Mix 2s смартфонларида дисплей ўрнини банд қилмаслик учун олд камерани қурилманинг пастки томонига кўчириб ўтказган. Натижада қурилманинг юқори қисми дисплей билан тўлиқ қопланган.
Ҳали яратилиш жараёнида бўлган Vivo Apex смартфонининг юзини тўлиқ дисплей билан қоплаш учун умуман кутилмаган ёндашув танланган: қурилмада қулоқ динамиклари мавжуд эмас ва унинг олд камераси Samsung Note қаламчаларидек смартфон ичига киргазиб қўйилган, яъни керакли вақтда камера ўзи тепага кўтарилиб чиқиб келади. Қулоқ динамиги ўрнига Vivo компанияси янги Screen SoundCasting технологиясини қўлламоқда. Бу мўъжиза технологияда овоз тўлқинлари бутун дисплей бўйлаб ҳаракатланади ва айнан дисплейдан товушларни эшитиш имкони пайдо бўлади.
Жорий йил ҳсоби бўйича ҳозирга қадар ASUS ZenFone 5 ва ZenFone 5Z, Oppo, Vivo ва Huawei P20/P20 Pro/P20 Lite смартфонлари «ўйиқ» дисплей билан тақдим этилди. Тез орада эълон қилиниши кутилаётган OnePlus 6 смартфони ҳам «ўйиқ» дисплейга эга бўлиши тасдиқланди. Xiaomi Mi 7 ва LG G7 қурилмалари ҳам айни шундай дизайнда чиқарилиши тахмин қилинмоқда. OnePlus компанияси ўзининг эълон қилиниши кутилаётган янги қурилмасида «ўйиқ» дисплей дизайнининг қўлланилиш сабабини экран кўламини янада кенгайтириш мақсади билан изоҳлаган.
Бироқ Huawei P20 смартфонида бундай мақсад кўзлангани мантиқан асосли эмасдек кўринади. Ҳуаwэи бу қурилмада дисплейнинг ўйиқ жойини исталган пайт қорайтириб, яшириб қўйиш имконини тақдим қилган, яъни фойдаланувчилар ўзлари хоҳлаган вақтда созламалардан қурилманинг юзидаги «кемтик» жойни билиндирмайдиган қилиб қўйишлари мумкин.
«Ўйиқ» дисплейли сматфонлар оммалашгандан сўнг фойдаланувчилар экраннинг ўйилган жойи видео томоша қилиш жараёнида ҳалақит беришидан шикоят қила бошлаган эдилар. OnePlus 6 қурилмасида айни ноқулайликнинг олдини олиш мақсадида видео қўйилгандан сўнг дисплейнинг ўйиқ жойи зудлик билан қорайиб қолиши таъминланган.
Бироқ янги қурилмалардаги ўйиқ жойни яшириб қўйиш мумкинлиги кўплаб интернет фойдаланувчилари орасида турли баҳсларга сабаб бўлмоқда. Агар ўйиш орқали дисплейнинг кўлами оширилсаю, лекин уни яшириб қўйиш мумкин бўлса, унда бундай дизайндан нима фойда, деган саволлар берилмоқда. Сиз бу ҳақида нима деб ўйлайсиз?
