Naruto мухлислари учун Realme'дан махсус смартфон
Realme ўзининг янги тақдим қилаётган қурилмалари билан аниме мухлисларини ўзига жалб қилишга ҳаракат қилмоқда. Компания ўтган йили ўзининг GT Neo 2 смартфонини Dragon Ball Z аниме сериалига асосланган чекланган миқдордаги махсус нашрини чиқарган эди, бу йил эса у яна бир таниқли аниме франшизаси билан ҳамкорлик қилмоқда. Realme GT Neo 3 Naruto нашри Хитойда тақдим қилинди.
Махсус нашрдаги смартфоннинг техник хусусиятлари 150W зарядланишни қўллаб-қувватлайдиган GT Neo 3 варианти билан бир хил. Dimensity 8100 чипсети, Android 12 га асосланган Realme UI 3.0, 12 GB оператив ва 256 GB доимий хотира, 4,500 mAh батарея, орқа асосий камераси 50MP, селфи камераси эса 16MP. Асосий эътибор қурилманинг ташқи кўриниши ва қадоқланишига қаратилган.
Телефон орқа панели асосан қора элемент билан аралаштирилган апелсин рангга эга, камера қисми эса металлдан ясалган бўлиб, у Narutoнинг бош тасмасидан илҳомланиб дизайнланган. Смартфон қадоқланиши ҳам умуман ўзгача. Аниме сериалдагидек айлана шаклидаги тўқ қизил махсус сумка смартфон, Naruto сурати туширилган кейс, Naruto дизайнидаги SIM карта чиқарувчиси, 150W қувватлагич адаптери ва кабели, шу билан бирга 10,000 mAh батарея сиғимига эга повербанкни ўз ичига олади. Шунингдек, смартфон ичкарида Naruto фон суратлари, иконкалари, овозлари ва махсус қувватлаш анимацияларига эга.
Realme GT Neo 3 Naruto Edition смартфони 31 майдан бошлаб $415 нархда Хитой бозоларида сотувга чиқарилади.
