Навбатдаги Telegram версияси қандай янгиликларни ўз ичига олиши маълум бўлди!

Навбатдаги Telegram версияси қандай янгиликларни ўз ичига олиши маълум бўлди!

Telegram'нинг Android ва iOS қурилмалари учун янги бета версияси чиқарилди ва у бир қанча ўзгаришларни ўз ичига олган.

Контакт профили учун расм ёки видео таклиф қилиш/уларга ўзингиз хоҳлаган сурат ёки видео қўйиш

Навбатдаги Telegram янгиланишини билан сиз ўз контактларингиз профили учун расм ёки видео таклиф қилишингиз мумкин бўлади. Бунинг учун контактингиз профилига ўтишингиз ва ўнг юқори бурчакдаги учта тугмадан "Контактни таҳрирлаш"га босиб, у ердан "Расм таклиф қилиш"ни танлашингиз керак. Таклиф қилмоқчи расмингизни галареянгиздан танлаб бўлганингиздан сўнг у суҳбатдошингизга қабул қилиш учун юборилади. Шуни айтиш керакки, ушбу функциядан фойдаланиш учун Premium обуна керак бўлмайди.

Шунингдек, агар хоҳласангиз энди контактларингиз профил суратига ўзингиз истаган суратни қўйиб олишингиз мумкин. Албатта, у фақатгина сизга кўриниб туради. Иккала функция ҳозирда фақат Android учун Telegram'нинг синов версиясида мавжуд.

Суратлар ва видеолар учун спойлер формати

Ўтган йилнинг 30 декабридаги Telegram янгиланишида иловага матнларни спойлер формати билан яшириш имконияти пайдо бўлган эди. Эндиликда Telegram ушбу хусусиятни суратлар ва видеолар учун ҳам кенгайтирмоқда ёхуд кейинги Telegram версиясида сиз сурат ёки видеоларни спойлер формати ортига яширингиз мумкин бўлади.

Бунинг учун керакли расмни танлаганингиздан сўнг юқори ўнг бурчакда пайдо бўладиган уч нуқтадан "Спойлер билан яшириш"ни танлашингиз керак. Қабул қилувчига сурат спойлер форматида етиб боради ва у сурат устига босганидан кейингина контентни кўриши мумкин бўлади.

Таъкидлаш жоизки, яқинда Telegram'да худди шундай функция билан контентни монетизация қилиш хусусияти пайдо бўлган эди.

Гуруҳ аъзоларини яшириш

Бета версиядаги яна бир сезиларли ўзгаришларнинг бири бу – гуруҳ аъзоларини яшириш хусусиятидир. Маълум бўлишича, кейинги янгиланишда пайдо бўладиган ушбу функцияни фақат 100 дан ортиқ обуначиларга эга гуруҳларда ёқиш мумкин бўлади. У ёқилганида эса барча обуначилар, шу билан бирга, аноним гуруҳ администраторлари гуруҳ аъзолари рўйхатида кўринмайди. Фақат аноним бўлмаган гуруҳ администраторларигина яширинилмайди. Функция гуруҳ созламаларининг "Аъзолар" бўлимида жойлашган.

Омма учун алоҳида профил сурат

Telegram анонимлик сари яна бир кичик қадам ташламоқда: кейинги янгиланиш билан сиз омма учун алоҳида профил сурат ёки видео қўйишингиз мумкин бўлади. У фақат сизнинг асосий профил суратингизни кўриш тақиқланганлар учун кўриниб туради. Бу функция асосий профил фотосини ҳамма ҳам эмас, фақат саноқли одамлар кўришини хоҳлаганлар учун фойдали бўлиши мумкин.

функциядан фойдаланиш учун "Хавфсизлик ва Махфийлик" бўлимидаги "Махфийлик" бўлимидан "Профил суратлари & видеолари"га ўтишингиз керак. У ерда сиз "Оммавий сурат ўрнатиш"ни кўрасиз. Эҳтимол, бу вақтинчаликдир, лекин ҳозир сиз фақатгина битта оммавий профил сурати ўрнатишингиз мумкин. Кейин сиз янгилашингиз ёки олиб ташласангиз бўлади.

Айтиш керакки, бу ғоя йил бошида дизайнерлар томонидан Telegram'га таклиф қилинган эди.

Янгиланган "Маълумот ва Хотира" менюси

Янги Telegram версиясидан "Маълумот ва Хотира" менюсининг қуйидаги ўзгаришлар билан янада яхшиланишини кутишингиз мумкин:

  • Диаграмма билан янгиланган хотира кўрсатилиши;
  • Хотирани банд қилиб турган "Бошқалар" ҳақида батафсил маълумот олиш;
  • Чатлар, гуруҳлар ва каналлар учун кешларни маълум бир муддатда автоматик тозалаш вақтини ўрнатиш;
  • Кеш ҳажми учун лимит қўйиш имконияти ва бошқалар;

Янгиланган дизайн, анимациялар ва бошқалар

Юқоридаги янги хусусиятлар билан бирга Android учун Telegram'да янги контакт қўшиш ойнаси, медиа таҳрирловчиси, форумлар учун хабарлар ҳисоблагичи, ҳамда "Хавфсизлик ва Махфийлик" бўлими дизайни сезиларли даражада янгиланган. Қўшимчасига, Android'да хабарлардаги гиперлинклар ёки жавоб хабарларини босганингизда янгича анимацияни, аудиофайллар учун вақт кодларини белгилаганингизда уларни бўлакларга бўлинганлигини кўрасиз. Қолаверса, Android'да энди проксилар учун QR-кодлар яратишингиз ҳам мумкин бўлади.

Шунингдек, Telegram жамоасидан янгича стикер ва эможилар тўпламини кутиб қоламиз. Ҳа, айтганча юқоридаги янги функцияларни барчаси бепул ёхуд ҳамма учун!

Навбатдаги Telegram янгиланиши келаси йилгача чиқарилиши кутилмоқда.

ЎҚИНГ: Galaxy S23+ ва Galaxy S23 Ultra'нинг расмий реклама постерлари тарқалиб кетди!

Хабарларни тез ва осон ўқиш учун Андроид иловамизни сақлаб олинг.