“Нейро-М” гарнитураси нигоҳ билан компьютерни бошқаришга ёрдам беради
Россиянинг “Объединённая приборостроительная корпорация” номли компанияси турли электрон қурилмаларни нигоҳ билан бошқариш имкониятини берадиган гарнитура прототипини намойиш қилди, деб хабар бермоқда 3D News сайти.
Ишланма “Нейро-М” деб номланган, у тўлдирилган реаллик функцияси билан жиҳозланган дисплей ва фойдаланувчининг нигоҳи қайси йўналишга қаратилаётганини аниқлайдиган тизим ўрнатилган. Гаджет кундалик ҳаётда одамнинг турли гаджетлар: компьютер, смартфон ва бошқа электрон маиший жиҳозлардан фойдаланишини осонлаштириш мақсадида яратилган.
Нигоҳни аниқлашга тизимда кўзда тутилган иккита камера ёрдам беради. Камералар бир сонияда 200 тагача кўз ҳаракатини кузатиш қобилиятига эга. Нейроинтерфейс эса фойдаланувчининг электроэнцефалограммасини таҳлил қилади ва электрон жиҳозларни бошқаришга кўмаклашади.
Гарнитура, айниқса, жисмоний нуқсонлари мавжуд одамларга яхши ёрдамчи бўлиши шубҳасиз. Нигоҳ билан бошқариш имконияти бундай ҳолатда клавиатура ва сичқонча ўрнини босиши мумкин.
Ҳозирда гарнитура синов босқичидан ўтмоқда. Қачон сотувга чиқарилиши номаълум.
