Ниҳоят, Redmi Note 9 Pro Max тақдим этилди – нарх ва жиҳатлари билан танишамиз!
Xiaomi корпорацияси ҳамёнбоп суббрендининг янги туркумида Redmi Note 9 ҳамда Note 9 Pro смартфонларини намойиш этиши кутилаётганди. Кейинроқ эса уларнинг янада илғор версияси – Redmi Note 9 Pro Max ҳақида эса нисбатан яқинда илк маълумот чиққан.
ЎҚИНГ: Умуман кутилмаган Redmi Note 9 Pro Max, илк «жонли» фото ва тарихдаги энг креатив тизер!
Буни қарангки, бугун – 12 март куни биринчи бўлиб айна мана шу – Redmi Note 9 Pro Max смартфони тақдим этилди. Компания уни яратишда Aura Balance номли дизайндан фойдаланган. Смартфоннинг олд томонида айтарли янгилик йўқ, аммо бош камера дизайнига бу гал ўзгача ёндашилган.
Янги смартфон диагоналига 6,67 дюймлик экранга эга: бу Redmi Note туркумидаги энг йирик моделдир. Қуйидаги суратда унинг габаритини Redmi Note 7 Pro ҳамда Redmi Note 8 Pro девайслари билан солиштириб кўрсатишган:
Кўриб турганингиздек, Redmi Note 9 Pro Max селфи-камераси экраннинг юқори қисми ўртасидаги тирқишга жойланган.
ЎҚИНГ: Энг кучли флагманлар ва ўрта нархли энг зўр смартфонлар (AnTuTu глобал рейтинги, 2020 йил февраль)
Смартфоннинг олд ва орқа панелларига Corning Gorilla Glass 5 ҳимоя шишаси ётқизилган. Бармоқ изи сканерини эса корпуснинг ўнг қиррасига ўрнатишган.
Redmi Note 9 Pro Max уч хил рангда таклиф этилади: Aurora Blue, Glacier White ҳамда Interstellar Black.
Xiaomi ушбу флагманини тўрт модулли камера билан жиҳозлаган бўлиб, унинг асосий сенсори 64 мегапикселлик аниқликда. Иккинчи – 8 мегапикселлик датчик ультра кенг бурчакли объективга эга. Шунингдек, макро-съёмка учун 5 ҳамда саҳна чуқурлигини аниқлаш учун 2 мегапикселлик модуллар қўлланган. Олд камеранинг якка датчиги 32 мегапикселлик аниқликка эга.
Redmi Note 9 Pro Max аппарат қисмининг асосини Qualcomm Snapdragon 720 процессори ташкил этади. Смартфоннинг тезкор хотираси 6 ва 8 гигабайтлик, UFS 2.1 туридаги ички хотираси эса 64 ва 128 гигабайтлик конфигурацияларда сотиб олиш мумкин бўлади. Буларга қўшимча яна 512 гигабайтгача ҳажмли microSD-карта ўрнатиш имкони ҳам бор.
Смартфоннинг аккумулятори 5020 мА/соатлик ток сиғимига ҳамда 33 ваттлик тезкор қувватлаш технологиясига эга. Қувонарлиси – шундай тезкор қувватлагич ҳам жамланманинг қадоғига киритилган.
Redmi Note 9 Pro Max тезкор/доимий хотира ҳажмига кўра қуйидаги нархларда сотилади:
6/64 ГБ – 200 доллар;
6/128 ГБ – 228 доллар;
8/128 ГБ – 255 доллар.
Бундан ташқари, яна Redmi Note 9 Pro ҳам намойиш қилинган ва мазкур моделнинг хусусиятлари ҳамда видеотавсифи билан мана бу хабаримизда танишинг.
