Nokia 3310: “афсонавий” телефон тақдим қилинди

Nokia 3310: “афсонавий” телефон тақдим қилинди

Nokia 3310 телефонининг қайта ишлаб чиқарилиши ҳақидаги гап-сўзлар кимгадир чин, кимга эса ҳазил бўлиб туйилган эди. Финляндиянинг HMD Global компанияси MWC 2017 Жаҳон Мобиль Конгресси кўргазмаси доирасида 26 февраль куни, орадан 17 йил ўтиб Nokia 3310 янги талқинда қайта расман намойиш қилинди. Айтиш жоизки, бу — 2000-йиллардаги аждодига ўхшаб кетадиган, бизга ўша давр хотираларини эсга соладиган телефон.

Телефонда 2,4 дюймли рангли дисплей мавжуд. Унинг пиксель сиғими QVGA (320х240)’га тенг. Телефон аппарати microSD хотирани кенгайтириш флешкасига мўлжалланган бўлмачага ҳам эга. Қолаверса, MP3-плеер орқали мусиқа ҳам тинглаш мумкин. Тўлиқ янгича дизайнга эга телефон олд панелида моддий тугмалар қолдирилган.

Nokia 3310 2 мегапикселли камерага эга. Бу камера LED фоточақноқ билан ҳам таъмин қилинган. Қурилма батарейкасининг сиғими 1 200 мА соат. Ишлаб чиқарувчининг маълум қилишича, уни тўлиқ қувватлаб, 22 соат суҳбат қуриш, 39 соат радио тинглаш, “кутиш” режимида 31 кун фойдаланиш мумкин. Телефон аппаратининг оғирлиги 85 грамм.

Телефон Series 30+ номли фирма дастурида фаолият кўрсатади. Унда Opera Mini браузери ҳам мавжуд. Шу билан бирга, энди бизга қадрдон «Змейка» ўйинини ҳам яна ўйнаш мумкин. Телефоннинг техник хусусиятлари орасида Bluetooth 3.0 ва SLAM хизматларини қўллаб-қувватлашини айтиш лозим.

Nokia 3310 аввалига тўқ кўк-қора рангда, жилоланадиган қизил ва сариқ, оқ рангларда сотувга чиқарилади. Телефоннинг нархи 49 евро (тахминан 51 АҚШ доллари). Nokia 3310’ни жорий йилнинг 2-чорагидан харид қилиш мумкин бўлади.