Nokia 9 -- мафтункор ва кучли смартфон
Финляндиянинг HMD Global корпорацияси йил бошидан бери 4 та смартфон тақдим қилишга улгурди. Улар орасида салкам флагман бўлган Nokia 8 Sirocco модели ҳам мавжуд. Бироқ бу девайс бозорда Samsung Galaxy S9 ёки бўлажак LG G7 флагманларига қарши туриб бера олмайди. Шу боис, компания айни пайтда Nokia 9 флагманини бозорга тайёрламоқда. Бу смартфон жорий йилнинг иккинчи ярмида тақдим қилинади.
Куни кеча Хитойнинг Weibo ижтимоий тармоғида Nokia 9 акс этган илк суратлар тарқалди. Унда бўлажак флагман ўзининг олд панелини тўлиқ намойиш қилган. Тан олиш керак, девайснинг ташқи дизайни диққатга сазовор.
Янгича фин флагмани олд панелида iPhone X флагманиники каби ўйиқ бор, бироқ анча ихчамроқ кўринишда. Бу ердан 2 та камера ҳамда суҳбат динамиги ўрин олган.
Nokia 9 экранининг ён томонлари бир оз қайрилма. Бундан келиб чиқадики, мазкур мобил қурилма экрани учун AMOLED-матрица танланган. 5,5 дюймлик OLED-экраннинг LG томонидан ишлаб чиқарилиши кутилмоқда. Экран остида эса олд панел дизайнини бузиб турган қора ҳошия қолдирилган.
Nokia 9 модели Android Oreo операцион тизими бошқарувида фаолият кўрсатади. Смартфон бошқаруви экрандаги виртуал тугмалар ёрдамида амалга оширилади. Ишлаб чиқарувчи iPhone X каби, бу гаджетни ҳам ишоралар орқали бошқариш технологиясини жорий қилса, мақсадга мувофиқ эди.
Nokia 9 модели шу йилнинг сентябрида Берлинда ўтадиган IFA 2018 анжуманида тақдим этилиши айтилмоқда. Агар бу суратлар ҳақиқий бўлса, айтиш мумкинки, Nokia 9 бемалол Sony Xperia XZ2, Samsung Galaxy S9 ва OnePlus 6 каби кучли рақибларга муносиб бўлади. Бироқ, аввалдан маълум қилингани каби, девайс 2,45 ГГц такт частотасига эга саккиз ядроли Qualcomm Snapdragon 835 базасида ишлайдиган бўлса, компания рақибларига ютқазиб қўйиши мумкин.
