Nokia флагмани Android 8.0 Oreo’гача янгилана бошлади, ўзгаришлар билан танишинг
HMD Global компанияси ўзининг Nokia 8 смартфони учун Android 8.0 Oreo тизим талқини асосидаги янгиланган прошивкасини тарқата бошлади. Бу ҳақда компаниянинг маҳсулотлар бўйича бош менежери Юхо Сарвикас (Juho Sarvikas) ўзининг Twitter-аккаунти орқали маълум қилган.
ЎҚИНГ: Расмий: Nokia 8 флагмани сотувга чиқарилди
Бета-синов ва якуний прошивка
Nokia’нинг Android 8.0 Oreo талқинига таянган прошивкаси V4.35J рақами билан келади ва 1,51 ГБ ҳажмга эга. Шунингдек, у Android’нинг ноябрдаги хавфсизлик янгиланишларини ҳам ўз ичига олади. Янгиланишнинг амалий имконияти смартфон жойлашган ҳудуд ва алоқа операторига боғлиқ, дейилади хабарда.
HMD жорий йилнинг октябри охиридан Nokia 8 фойдаланувчилари орасида Android 8.0 Oreo талқинининг бета-синовини йўлга қўйган эди. Сарвикаснинг сўзларига кўра, тестларда икки мингдан ошиқ киши иштирок этган. Яқин орада Android 8.0 Oreo’ни синаб кўриш имкони Nokia 3, 5 ва 6 смартфонларининг соҳибларига ҳам тақдим этилади.
Нималар ўзгарган?
Хўш, Android операцион тизимининг 8.0 Oreo талқини Nokia 8 фойдаланувчиларига қандай имкониятларни тақдим этади?
Улар қуйидагилардир:
- «Сурат ичида сурат» режими;
- Энди билдиришномалар нуқталар шаклида;
- Хавфсизлик тизимининг Google 2017-11 янгиланиши;
- «Google Play Ҳимоя» иловаси ёрдамида хавфсизликни текшириш;
- Паролларнинг автоматик тўлдирилиши.
