Nokia ўта қиммат гаджет ишлаб чиқаради

Афсонавий мобил телефонлари ва смартфонлар ишлаб чиқарувчиси ўзи учун янги бўлган бозорга чиқишга қарор қилди. Nokia нархи 60 минг доллар бўлган OZO виртуал воқелик камерасини тақдим этди.

Камера 2014 йилда Dolby Laboratories`дан Nokia`га ўтган Рэмзи Хайдамус томонидан такомилга етказилди. Хайдамуснинг қайд этишича, Nokia раҳбарияти уни истеъмол қурилмаларини ишлаб чиқиш билаг шуғулланувчи бўлинмалари фаолиятини ўрганиш мақсадида компанияга таклиф қилишган эди. У лабораторияларни кўздан кечирар экан, улардан бирида аввалроқ тайёрланган виртуал воқелик камераси прототипига дуч келади.

Муҳандис прототипни шундай тасвирлайди: у кўринишидан жуда қўрқинчли бўлиб, ҳаводаги саккиз объектив ва ўтказгичлар тутамидан иборат эди. Бир сўз билан айтганда, саккиз кўзли ўргимчакни эслатарди.

Орадан бир ярим йил ўтганидан сўнг “ўргимчак” Nokia OZO – синхронизацияланган (бир-бирига мослашадиган) саккизта 2Кх2К объектив ўрнатилган 4,2 килограммлик кулранг сидирға шарга айланди. Гаджет 500 Гб ҳажмли хотира модули билан таъминланган бўлиб, автоном равишда 45 дақиқагача тасвирга олади.

Бугунги кунда роликларни виртуал воқеликда тасвирга олишда асосан GoPro экшн-камераларидан фойдаланилмоқда. Бироқ ундан фойдаланишда овозларни ёзиб олиш ва бошқалар учун қўшимча қурилмалар талаб қилинади. OZO эса ишга тўла равишда тайёр: унда тасвирга олиш учун керакли барча воситалар, жумладан, камералар ва овоз ёзиш қурилмалари жамланган.

Албатта, 60 минг доллар жуда қимматдек туюлади. Бироқ профессионаллар учун унинг нархи, имкониятларини ҳисобга олганда, унчалик қиммат эмас.