Nokia янги смартфонларининг тақдимот кунини расман эълон қилди
Кўпдан бери кутилаётган Nokia 9 PureView смартфони Mobile World Congress 2019 кўргазмасида намойиш этилиши тахмин қилинаётган эди. Бугун шунинг расмий исботи чиқди – HMD Global ушбу тадбирда қатнашишини маълум қилди.
ЎҚИНГ: Nokia смартфонларининг Android 9.0 Pie’гача янгиланиш графиги билан танишинг!
Аниқроғи, HMD Global бош директорининг ўринбосари Юхо Сарвикас (Juho Sarvikas) буни ўзининг Twitter-аккаунти орқали эълон қилди.
Сарвикасга кўра, MWC 2019 кўргазмаси доирасида, унинг нолинчи куни – 24 февраль санасида HMD Global компанияси тақдимот маросимини ўтказади. Унда Nokia 9 PureView флагманидан ташқари, яна Nokia 8.1 Plus ҳамда Nokia 6.2 моделлари ҳам намойиш этилиши кутилмоқда. Шунингдек, бренднинг эски мухлисларини ҳам эътиборга олган ҳолда, айрим классик Nokia телефонларини ҳам янгича талқинда тақдим этишса керак.
Айрим кузатувчиларнинг тахминига кўра, Nokia 9 PureView камерофонига имкон қадар кўпроқ эътиборни жалб этиш учун, компания уни Mobile World Congress 2019 тадбиридан ҳам олдин, алоҳида тақдимот маросимида намойиш қилиши ҳам мумкин.
