Nothing ўзининг илк смартфони тўлиқ дизайнини кўрсатди!
OnePlus асосчиларидан бири бўлган Карл Пейнинг янги стартап компанияси, Nothing, жорий йилнинг 12 июл куни илк смартфонини тақдим қилишни режалаштирган. Тақдимот санаси яқинлашар экан, лондонлик компания ўзининг phone (1) дебют телефони турли қисмлари кўрсатилган тизер суратларни улашишни бошлади.
Аммо, бугунга келиб Nothing тўсатдан Phone 1'нинг орқа томони тўлиқ дизайни расман намойиш қилишга қарор қилди ва... барабар овози... мана у:
Сурат бўлажак смартфоннинг шаффоф дизайни ҳақидаги миш-мишларни тасдиқлайди. Кўриб турганингиздек, телефон орқа томонида унинг эълон қилиниш тадбирида кўрсатилгани каби камера ўрни ва симсиз қувватлаш ҳалқасига ишора қиладиган оқ чизиқлар мавжуд. Шунингдек, қурилма орқа томонининг марказида компаниянинг мултфилмлардаги бомбага ўхшайдиган логотипини кўриш ҳам мумкин.
Эътиборлик нарсалардан яна бири камера бўлиб, phone (1) орқа томонида ундан иккита мавжуд ва улар телефон орқа чап томони юқорисида вертикал тарзда жойлашган. Смартфоннинг овоз бошқаруви тугмаларини унинг чап томонида, ёқиш тугмаси эса ўнг томонида турибди. Афсуски, Nothing Phone 1'нинг олд томони кўрсатилмаган.
Nothing ўзининг Phone 1 смартфони дизайнини ошкор қилганидан кейин, компания раҳбари Карл Пей ўз Twitter саҳифасида шундай дейди:
"Бугунги кунда маълумотлар тарқалишининг олдини олиш қийин ва кўпчилигингиз анчадан бери кутаётган эдингиз. Шундай экан мана у. Бу phone (1) дизайни. Кўпи ҳали олдинда. 12 июлга тайёрланинг."
Буларнинг бари содир бўлишидан аввал эса Карл Пей ва жамоа иштирокидаги смартфон тақдимотига тайёргарликнинг саҳна ортидаги лавҳалари видеоси Nothing расмий YouTube саҳифасига чиқарилган ва унда Карл Пейнинг phone (1) ушлаб тургани пайқаб қолинган эди.
Видеодан олинган суратда компания раҳбари ушлаб турган телефон ва бугунги расмий суратдаги телефон бир-бирига 100% мос келади ва бу бўлажак phone (1) дизайнидир.
phone (1) техник хусусиятларига келадиган бўлсак, у Qualcomm'нинг Snapdragon 7 Gen 1 чипсети билан Android 12 операцион тизимига асосланган Nothing OS қобиғида ишлайди ва симсиз зарядланишни қўллаб-қувватлайди.
Nothing ўзининг phone (1) смартфонини 12 июл куни Тошкент вақти билан 20:00 да тақдим қилинади.
ЎҚИНГ: Nothing смартфони зарядланиш тезлиги маълум бўлди
