Оддий смартфонлар урфдан қолмоқдами? Яна икки смартфон бренди буклафон чиқармоқчи!
Сўнгги йилларда букламафон ишлаб чиқарувчи брендлар сони бир нечтага кўпайди. Бозордаги сўзсиз қирол, Samsung, ҳам Galaxy Z Fold, ҳам Galaxy Z Flip учун бир қанча рақобатчилар орттирди ва бу давом этмоқда. Маълум бўлишича, эндиликда Meizu ва Realme компаниялари ҳам ўйинга қўшилмоқчи.
Хитойнинг Meizu бренди яқинда ўз логотипини янгилади ва ҳозир Meizu 20 сериясини тақдим қилишга тайёрланмоқда. Шунингдек, компания ижрочи вице-президенти, Ҳуанг Жипан берган маълумотларга кўра, Meizu жорий йил охиригача ўзининг илк букламафонини чиқаради. Ҳозирча эса унинг қандай бўлиши ҳақида ҳеч қандай маълумотлар ошкор қилинмаган.
Яна бир томонда эса Realme ҳам букламафонлар бозорига киришни режалаштираётган кўринади. Компания сўнгги ва ривожланган технологияларга бегона эмас. Яқинда у ўзининг 240 Вт тезликда зарядланадиган смартфонини тақдим қилди. Ва энди компания вице-президенти, Мадхав Шет, ўзининг Twitter саҳифасида "Кейингиси учун нима хоҳлайсиз... #realmeFlip ёки #realmeFold" дея твит қолдирди. Гарчи бу хабар компания расман Galaxy Z Flip ва Z Fold букламафонлари учун рақобатчи тайёрлаётганини 100% тасдиқламаса ҳам, ундан компания ҳеч бўлмаганда букланадиган экранли смартфон ишлаб чиқаришни ўйлаб кўраётганлигини билиб олишимиз мумкин.
Шуни ҳам айтиб ўтиш керакки, Google компанияси ҳам анчадан бери ўзининг Pixel Fold номли букланадиган экранли қурилмасини ишлаб чиқариши ҳақида миш-миш қилиб келинади. Эҳтимол, биз бу ҳақда яқинлашиб келаётган Google I/О тадбирида билиб олишимиз мумкин бўлади.
Букламафонлар бозорида ҳозирда 10 га яқин брендлар бор ва уларнинг энг охиргиси Tecno бренди бўлди. Компаниянинг илк букламафони, Phantom V Fold, бозордаги энг арзон нархда таклиф қилинаётган букламафон бўлиб турибди.
