Офарин! Huawei лидерга айланди
Жанубий Кореянинг Samsung компанияси Россия смартфонлар бозорида биринчиликни қўлдан бой бермоқда. Энди Хитой компанияси – Huawei’нинг даври келди, чамаси. «Ведомости» нашри савдо тармоқлари вакилларининг бири етказган маълумотларга таяниб ана шу ҳақда ёзмоқда.
Хабарда жумладан, шундай дейилади, – Ўтган уч ҳафта давомида, яъни 28 майдан 17 июнгача бўлган вақтда Huawei улуши смартфонлар сони бўйича 23,8, 24,2 ва 26,5 фоизларни ташкил этган. Худди шу вақт мобайнида эса Samsung компаниясининг кўрсаткичи тегишлича 22, 23 ва 23,2 фоиз бўлган.
ЎҚИНГ: «Жонли» фото: Huawei Mate 20 камида тўртта камерали бўлади!
Хабарда таъкидланишича, 21 майдан 27 майгача кореялик ишлаб чиқарувчилар 22,6 фоизлик кўрсаткич билан Россия смартфонлар бозорида лидер бўлиб турганди. Бу вақтда Huawei ва унинг суббренди Honor бозорнинг 21,3 фоизини эгаллаб келаётганди. Шуниси қизиққи, шу йилнинг февраль ойида Huawei смартфонлар савдоси бўйича Apple компаниясини ҳам қувиб ўтганди. Мана энди Samsung ҳам ортда қоляпти, қойил!
Mobile Research Group таҳлилчиси Эльдар Муртазин «Ведомости» нашрига интервью берар экан, Samsung 10 йил давомида илк бор лидерликни қўлдан бой берганини тасдиқлаган. Унинг фикрича, бу моделлар қаторининг мувофиқлаштирилиши натижасида рўй берди. Масалан, Корея компаниясининг 10 мингдан то 15 минг рублгача бўлган моделлар қатори Huawei’никидан фарқли улароқ, оз тақдим этилган.
ЎҚИНГ: Малайзияда смартфон портлаши фожеага олиб келди
Шунингдек, «Ведомости» нашри Acer’нинг Россия минтақаси бўйича бош директори Дмитрия Кравченконинг фикрини ҳам келтиради. Унда айтилишича, ҳозирда бозор улушида биринчи навбатда нарх асосий аҳамият касб этади. Россия бозоридаги улушини оширмоқчи бўлган компания биринчи навбатда арзонроқ, лекин яхши тавсифли ҳамда чиройли дизайнли, ва ниҳоят рақиб компанияларнинг худди шу тоифадаги смартфонларидан арзон бўлган смартфонларни таклиф этсагина харидорлар кўнглидан чиққан бўлади.
