Оммабоп смартфонлар топ ўнталиги (январ ойи)

Оммабоп смартфонлар топ ўнталиги (январ ойи)

Жорий йилнинг биринчи ҳафтаси GSMArena сайтининг оммабоп смартфонлар ҳафталик рўйхатида ноодатий лидерлар билан бошланди. Хусусан, Motorola'нинг Lenovo ThinkPhone бизнес смартфони CES 2023 тадбирида оғиздан тушмади ва у 2023 йилнинг илк ҳафтасида топ 10 рўйхатнинг биринчи ўрнини эгаллади. Шунингдек, ўша ҳафтада Redmi Note 12 сериясидаги смартфонлар илк марта ўз ватанидан ташқарида, Ҳиндистонда дебют қилиши билан иккинчи ва учинчи ўринларни эгаллашди. Тўртинчи ўринни Galaxy S22 Ultra эгаллаган бўлса, янги йил арафасида сотувга чиқарилган Redmi К60 Pro топ бешликни якунлади. Гарчи OnePlus 11 ҳам янги тақдим қилинган бўлсада, у унчалик эътибор торта олмади шекилли, рўйхатниг олтинчи ўрнидан жой олди. Навбатдаги ўринлар Galaxy А53 5G, iPhone 14 Pro Мах ва Xiaomi 13 Pro томонидан банд қилинган бўлса, рўйхат салкам 5 йил аввал тақдим қилинган iPhone XR билан тугалланган.

Январ ойи ўрталарига келиб, ҳали тақдим қилинишига бир неча ой бор бўлган Galaxy А54 смартфони топ ўнликка қўшилиб, биринчи ўринни эгаллаб олди. Redmi Note 12 Pro биринчиликдан бир қадам ортда турибди. Миш-мишлар кучи билан эса Galaxy S23 Ultra ҳам рўйхатга янги қўшилиб, топ учликни якунлаган. Galaxy S22 Ultra эса ўз жойини ҳеч кимга берганича йўқ, у ҳали ҳам тўртинчи ўринда. OnePlus 11 смартфони аввалги ҳафтадан бир поғона юқорига кўтарилиб олган бўлса, ўша ҳафтадаги "кумуш медал" соҳиби олтинчи ўринга тушиб қолган. Samsung Galaxy'лари оғзидаги ошни олдириб юборадиганлардан эмас: Galaxy А54 ҳам ўз ўрнини маҳкам ушлаган. Ҳиндистонда янги тақдим қилинган Galaxy А14 5G эса iPhone 14 Pro Мах'дан саккизинчи ўринни ториб олиб, унинг ўзини тўққизга тушириб қўйган. Топ ўнлик Galaxy А54 билан тақдим қилиниши кутилаётган Galaxy А34 билан тугаллаган.

Миш-мишлар ва жуда кўплаб маълумотлар тарқатилиши ортидан февралда чиқарилиши кутилаётган Galaxy S23 смартфонлари ҳамманинг эътиборини ўзига тортди: Galaxy S23 Ultra январ ойи учинчи ҳафтасида лидерликни ўз қўлига олган бўлса, ундан кейинги ўринни Galaxy S23 Plus эгаллаган. Орада Galaxy А14 бўлмаганида, Galaxy S23 билан топ учлик ажойиб тарзда якунлаган бўлар эди. Лекин шунда ҳам Galaxy S22 Ultra билан топ бешлик тўлиқ Samsung смартфонлари билан тугалланган. Олтинчи ўринда Redmi Note 12 Pro турган бўлса, iPhone 14 Pro Мах Galaxy А53'ни саккизга тушириб ўзи еттинчи ўринни эгаллашга муваффақ бўлган. OnePlus 11 тўққиз, Redmi Note 12 ўнинчи ўринни банд қилган.

Ўтган ҳафтага келадиган бўлсак, тақдимот санаси яқинлашиб келар экан, Galaxy S23 Ultra ҳали ҳам биринчиликни сақлаб турибди. Яна бир Samsung смартфони, Galaxy А14 эса юқорига ҳаракатланишда давом этмоқда, у иккинчи ўринга чиқиб олди. Янги миш-мишлар билан Poco 5Х Pro рўйхатга янги қўшилиши билан учинчи ўринни эгаллаб олган. Galaxy S22 Ultra ўзининг тўртинчи ўрнига қайтиб олган бўлса, Galaxy А53 эса унга етиб олган. Кутилмаганда олтинчи, еттинчи ва тўққизинчи ўринлар Apple смартфонлари: iPhone ХR, iPhone 14 Pro Мах ва iPhone Х томонидан банд қилинган. Xiaomiънинг Redmi Note 12 смартфонлари эса рўйхатдан чиққиси йўқ. Оддий модел саккизинчи ўринда бўлса, топ ўнлик Pro модел билан тугалланган.

  1-ҳафта 2-ҳафта 3-ҳафта 4-ҳафта
1. Motorola Thinkphone Samsung Galaxy A54 Samsung Galaxy S23 Ultra Samsung Galaxy S23 Ultra
2. Xiaomi Redmi Note 12 Xiaomi Redmi Note 12 Pro Samsung Galaxy S23+ Samsung Galaxy A14 5G
3. Xiaomi Redmi Note 12 Pro Samsung Galaxy S23 Ultra 5G Samsung Galaxy A14 5G Xiaomi Poco X5 Pro
4. Samsung Galaxy S22 Ultra 5G Samsung Galaxy S22 Ultra 5G Samsung Galaxy S23 Samsung Galaxy S22 Ultra 5G
5. Xiaomi Redmi K60 Pro One Plus 11 Samsung Galaxy S22 Ultra 5G Samsung Galaxy A53 5G
6. OnePlus 11 Xiaomi Redmi Note 12 Xiaomi Redmi Note 12 Pro Apple iPhone XR
7. Samsung Galaxy A53 5G Samsung Galaxy A53 5G Apple iPhone 14 Pro Max Apple iPhone 14 Pro Max
8. Apple iPhone 14 Pro Max Samsung Galaxy A14 5G Samsung Galaxy A53 5G Xiaomi Redmi Note 12
9. Xiaomi 13 Pro Apple iPhone 14 Pro Max OnePlus 11 Apple iPhone X
10. Apple iPhone XR Samsung Galaxy A34 Xiaomi Redmi Note 12 Xiaomi Redmi Note 12 Pro

ЎҚИНГ: Қайси смартфон бренди ўз қурилмасини янгиланишлар билан энг узоқ қўллаб-қувватлайди?

Сайт янгиликларидан доимий хабардор бўлиш учун Телеграм каналимизга қўшилинг!