Оммабоп Xiaomi смартфонларидан бирининг хотираси икки карра кучайтирилмоқда, нархи эса эскича...
Xiaomi компанияси ўзининг оммабоп моделларидан бири – Redmi Note 5 қурилмасини доимий хотираси икки карра оширилган талқинда тақдим этди. Аниқроғи – тезкор ва доимий хотираси тегишлича 6 ва 128 гигабайтга тенг бўлган ушбу смартфон 27 июлдан савдога чиқарилади.
ЎҚИНГ: «Xiaomi’ча жанг»: Redmi S2, Redmi 5 Plus ва Redmi Note 5
Ажабланарли томони шундаки, Xiaomi ушбу «бағри кенг» смартфонга 250 доллар атрофида нарх белгилаган. Redmi Note 5 модели бозорга энди чиқарилганида, унинг 6/64 гигабайтлик талқини ҳам айни шундай нархда эди. Эслатиб ўтамиз, мазкур девайснинг 3/32 гигабайтлик хотирага эга варианти ҳам мавжуд.
Янги вариантдаги Redmi Note 5 смартфонининг экрани пикселлар сиғими 2160х1080 бирликка тенг. Гаджет якка кристалли Qualcomm Snapdragon 636 чипи, 12 ва 5 мегапикселли фотомодулларга эга қўшалоқ камера ҳамда бармоқ изи сканери билан таъминланган. Смартфон Android 8.1 талқинидаги прошивкага эга бўлиб, Project Treble’ни қўллаб-қувватлайди. 4000 мА/соат сиғимли аккумулятори эса Qualcomm Quick Charge 3.0 тезкор қувватлаш технологиясига эга.
Айни дамда юртимиз бозорларида Redmi Note 5 смартфонининг хотира ҳажми 3/32 ҳамда 6/64 гигабайтлик талқинларини харид қилиш имкони бор.
