OnePlus 5 смартфони ҳам iPhone X’даги каби функцияга эга бўлди

«Ҳеч қачон қотмас» смартфонлари билан танилган OnePlus компанияси ўзининг OnePlus 5 модели учун OxygenOS 5.0.2 прошивкасининг барқарор талқинини тақдим этди. Бу версиядаги асосий янгиликлардан бири – 2017 йилнинг энг кучли смартфони бўлмиш ушбу қурилмага Face Unlock функцияси ҳам қўшилганидир.

ЎҚИНГ: Жаҳоннинг энг кучли смартфонлари – ТОП10

Айтиш керакки, Face Unlock функцияси компаниянинг бундан кейинги смартфони – OnePlus 5T билан бирга тақдим этилган. Унда гаджетни юз-қиёфа орқали блокировкадан чиқариш технологияси жорий қилинган бўлиб, 90 фоиз ҳолатда аниқ ишлайди. Олд панелда бунинг алоҳида камера мавжуд эмас, камеранинг ўзи қиёфани текширувдан ўтказишга мўлжалланган.

Аммо OnePlus смартфонларидаги Face Unlock функцияси барибир iPhone X’даги FaceID сингари ўта ишончли эмас. Компания буни яхши билади ва шу боис ҳам гаджетни блоклаш ва блокдан чиқаришда бармоқ изи сканери энг ишончли усул эканини эътироф этади.

ЎҚИНГ: OnePlus 5, Mi6, iPhone 7+, Galaxy S8: флагманларга хос 6 жиҳатни таққослаймиз

Face Unlock’дан ташқари, OxygenOS 5.0.2 прошивкасида бир қанча янги имконият ва функциялар ҳам тақдим этилган. Жумладан, видео суратга олишда электрон барқарорлаштириш имконияти ҳамда «Қайдлар» иловаси қўшилган. «Галерея», «Об-ҳаво» иловаларини ҳамда файл менежерини янгилашган. OxygenOS’нинг майда нуқсонлари бартараф этилган.

Таъкидлаш керакки, OxygenOS 5.0.2 прошивкаси OnePlus 5T фойдаланувчиларига ҳудудлар бўйича босқичма-босқич тақдим этилади. Лекин, агарда кутишни истамасангиз, VPN’ни фаоллаштириб, смартфон созламаларида ҳудудни «Канада» ёки «Германия» сифатида белгиласангиз бўлади. Шундан сўнг янгиланишларни текширсангиз, OxygenOS 5.0.2 прошивкаси «кўринади» ва уни юклаб олиб смартфонингиз прошивкасини янгиласангиз бўлади.

ЎҚИНГ: VPN нима ўзи?