OnePlus 6 ҳимоясини оддийгина сурат билан ҳам бузса бўлар экан! (+видео)

  •   DiMaX
  •  820
  •  31.05.2018 11:46

OnePlus 6 ҳимоясини оддийгина сурат билан ҳам бузса бўлар экан! (+видео)

Хитойлик таниқли смартфонсозлардан бўлган OnePlus компанияси ўз мобил телефонларининг «асло қотмас»лиги ва тезкорлиги билан фахрланади. Шунингдек, улардаги юзни сканерлаш функцияси ҳам анча тез ишлайди.

ЎҚИНГ: Флагманлар кушандаси -- OnePlus 6 тақдим қилинди

Лекин компаниянинг яқиндагина – май ойининг ўртасида тақдим этилган OnePlus 6 флагманидаги юз сканери орқали ҳимоя функцияси мустаҳкам эмаслиги аниқланди. Буни шунчаки бир ҳаваскор – @rikvduijn никли Twitter фойдаланувчиси синаб кўриб, видеога муҳрлади ва ижтимоий тармоқда эълон қилди.

Тажрибада @rikvduijn ўз ҳамкасбининг яп-янги OnePlus 6 смартфонини олган, унинг эгаси фотосуратини қоғозга чиқариб, шу расм ёрдамида смартфонни блокировкадан чиқаришга ҳаракат қилиб кўрган. Буни қарангки, салгина ушланиб қолса-да, смартфон расмдаги «эгаси»ни таниган ва қулфни очиб берган.

ЎҚИНГ: Смартфонни бегона кўздан сақловчи илова яратилди! (+видео)

Мана, OnePlus 6 смартфонини сурат билан алдаш жараёнини ўзингиз томоша қилишингиз мумкин:

Қизиғи шундаки, ўтган йилги OnePlus 5T смартфони мазкур компаниянинг юз сканерига эга илк модели бўлиб, унинг ҳимоясини оддий фотосурат билан асло алдаб бўлмайди. Бу борада бир неча марта тажрибалар ўтказилган ва мазкур қурилма ҳар гал ҳимоясининг мустаҳкамлигини намоён эта билган.

OnePlus 6 ҳимоясидаги нозикликни билиб олган унинг эгаси тезда ишлаб чиқарувчи билан боғланган ва бу муаммо ҳақида хабар берган. OnePlus вакилларининг маълум қилишича, улар аллақачон бу масалани ўргана бошлашган.

ЎҚИНГ: Android учун «дунёдаги энг зўр» юзни таниш тизими Россияда яратилди

Сайтимизнинг энг чиройли расмларини Инстаграмдаги саҳифамизда томоша қилинг!