OnePlus 8 Lite'нинг рендерлари билан танишамиз
2020 йилнинг иккинчи чорагида сотувга чиқиши кутилётган OnePlus 8 ва OnePlus 8 Pro смартфонларининг реденделарини октябрда кўрган эдик. Энди эса ушбу смартфонлар билан бирга сотувга чиқиши мумкин бўлган Lite версияли гаджет ҳақида маълумот тарқалди.
Қурилманинг компьютер ёрдамида яратилган рендерлари таниқли инсайдер OnLeaks томонидан сиздирилди.
Маълум бўлишича, 8 Lite бир хил дизайндаги 8 ва 8 Pro'лардан дисплей ромларининг қалинроқлиги, экран ўртасида айлана тирқиш бўлиши билан фарқ қилади.
Смартфоннинг орқа панели шиша билан қопланади. Унинг юқори чап бурчагидаги камера модули тўртбурчак панелга ўрнатилган бўлиб, иккита камера, уларга қўшимча LED ёритгичи ва ToF сенсоридан иборат бўлади.
OnePlus 8 Lite'нинг орқа қисмида бармоқ изи сканери мавжуд эмаслиги сканернинг дисплей остида жойлашганлигини англатади, бу эса гаджет AMOLED панелли бўлишидан далолат беради. Дисплейнинг янгиланиш частотаси 90Hz ни ташкил этадими ёки йўқми, буниси ҳозирча номаълум.
OnePlus 8 Lite'нинг тугмалари, SIM карта уяси, USB-C порти ва карнай жойлашуви 8 ва 8 Pro'ларники билан бир хил. Бироқ Lite'нинг корпуси қалинлиги 8.6 мм бўлиб, OnePlus 8'га қараганда қалинроқ, 8 Pro'никидан эса ингичкароқдир.
Флагман бўлганлиги сабаб, OnePlus 8 ва 8 Pro смартфонлари яқинда тақдим этилган Snapdragon 865 чипида ишлаши кутилмоқда. OnePlus 8 Lite ўрта тоифадаги смартфон бўлганлиги учун унга ўрта тоифадаги чип ўрнатилиши мумкин, десак адашмаган бўламиз.
Компания OnePlus 8 серияси ҳақида ҳали ҳеч қандай маълумот айтмаган, лекин келгуси ҳафта ёки ойларда ушбу гаджетлар ҳақида батафсил маълумотларни билиб оламиз. Бизни кузатишда давом этинг.
ЎҚИНГ: Samsung компанияси 108 МПлик камера борасида Xiaomi’ни боплаган экан!
