OnePlus асосчиси Apple’га миннатдорчилик билдирди
Хитойнинг OnePlus компанияси куни кеча сўнгги флагмани бўлган OnePlus 5 мобил телефонини смартфон майдонига туширди. Экспертларнинг фикрича, гаджетнинг ўзига хосликлари қаторида биринчи бўлиб, қўш объективли бош камерани эътироф этиш керак. Компания директори Пит Лау The Verge халқаро нашрига интервю берар экан, OnePlus 5’нинг 2 та сенсорли бош камераси матрицасини айни пайтда смартфон оламида энг юқори сиғимга эгалигини қайд этди.
Энг қизиғи, компания раҳбари камерафон технологиясининг илғор жиҳатлари учун шахсан америкалик ишлаб чиқарувчи Apple’га миннатдорчилик билдирди. Пит Лаунинг сўзларига кўра, смартфон бозори ва саноатининг ўргатгани учун хитойлик ишлаб чиқарувчилар Apple’га раҳмат айтишлари керак.
Жумладан, Apple iPhone 7 Plus флагманида жорий қилинган 28 мм.ли кенг бурчакли линза ҳамда 56 мм.ли телефото линзаси Хитой смартфонсозлик саноатида қўш объективли бош камера тенденциясининг ривожига улкан туртки бўлган. Хусусан, OnePlus 5 ҳам ўзининг илғор технологиясини яратишда ана шу америкача тажрибага суянган.
OnePlus компаниясининг камера технологиялари бўйича директори Симон Лиюнинг маълум қилишича, OnePlus 5’нинг бош камерасидаги сенсорлар алоҳида эмас, ягона тизимда ишлайди.
OnePlus 5 бош камераси 16 ва 20 мегапикселли сенсорлар бирикувидан иборат. Бунинг учун илғор Sony IMX398 ҳамда Sony IMX350 телефото, яқинлаштирувчи линза мавжуд датчикларидан фойдаланилган. Бош камера фокусни асосий объектга қўйиб, унинг ортини хиралаштириб олиш функциясига эга.
OnePlus компаниясининг даъво қилишича, корпус қалинлиги 7.25 мм бўлган OnePlus 5 жаҳоннинг энг юпқа телефон аппаратларидан бири. Гаджет 5.5 дюймли full-HD (1080×1920 пикселли) Optic Amoled дисплей, 8 ядроли илғор Qualcomm Snapdragon 835 процессори, 6/8 ГБ тезкор хотира билан таъминланган.
Батафсил ўқинг: OnePlus 5: «айфон кушандаси», энг юпқа смартфон тақдим қилинди.
