OnePlus’нинг «кемтик»ли экранга эга янги флагманини илк «жонли» суратда кўринг!
«Ҳеч қачон қотмас» смартфонлари билан танилган OnePlus компанияси ўзининг навбатдаги флагманини тайёрлаётгани ҳақида кўпдан бери хабарлар юрибди. Энди эса, инсайдерлар жорий йилда тақдим этиладиган ушбу қурилманинг биринчи «жонли» расмини интернетга чиқариб юборишди.
ЎҚИНГ: OnePlus 5T: кучли Android-флагман икки баробар арзон!
Манбаларнинг таъкидлашича, янги флагман OnePlus 6 ёки OnePlus 7 деб номланиши мумкин. Ушбу смартфон дисплейининг дизайни ҳам, ҳозирги кўпчилик телефонларда учраётгани каби, iPhone X’дан «кўчирилган» – унинг юқори қисмида «ўйиқ» мавжуд.
Флагманнинг орқа қопқоғи шишадан ишланганига қараганда, у симсиз зарядлаш функциясини ҳам қўллаб-қувватлайдиган бўлса керак. Қўшалоқ камера модуллари остида фоточақноқ, ундан пастда дактилоскопик датчик мавжуд, унинг ҳам тагида эса компания логотипи туширилган.
Смартфон 6 ГБ тезкор хотира ва 64 ГБ доимий флеш-хотирага эга. Унинг бошқарувини OxygenOS 5.1.0 MEA_3 график қобиғи остидаги Android 8.1.0 Oreo операцион тизимига топширишган. Девайснинг «юраги» якка кристалли Snapdragon 845 тизими бўлиши тахмин қилинмоқда.
ЎҚИНГ: ЭКСКЛЮЗИВ ВИДЕО: OnePlus 5T ҳатто iPhone X ва Samsung Galaxy S8’дан ҳам зўр чиқди!
