Oppo A9 тақдим қилинди: катта хотира ва йирик аккумулятор!
Oppo компанияси Хитой бозорига мўлжалланган 267 доллар нархли янги A9 смартфонини тақдим этди. Намойиш бўлиб ўтганига қарамасдан, смартфонга қайси процессор ўрнатилгани айтилмади. Аммо бу MediaTek Helio P70 эканлиги тахмин қилинмоқда.
Смартфон 6 ГБ оператив, 128 ГБ ички хотира ва Full HD+ аниқлигидаги 6,53 дюмлик, томчисимон «кемтик»ли йирик дисплейга эга бўлган. Компаниянинг айтишича, экран смартфон олд панелининг 90,7% майдонини эгаллаган.
Янги қурилманинг селфи камераси 16 мегапиксел, асосий жуфт камераси эса 16 ва 2 мегапикселлик модуллардан иборат. Oppo асосий камераси билан мақтанмоқда, аммо ундан мўжиза кутиб бўлмаслиги аниқ.
Аккумулуятор сиғими 4020 мА/соатлик бўлиб, ундан яхшигина автономликни кутса бўлади. Смартфон кўк, яшил ва оқ рангларда сотувга чиқарилиши айтилмоқда.
